SuperBalita Cebu
Wednesday, May 21, 2014
NABUAK ang ulo sa usa ka hamtong nga lalaki nga nisulong sa iyang silingan nga dugay na niyang gikadumtanay human siya pusila niini makaduha niadtong Martes sa alas 5:30 sa hapon sa Barangay Poblacion, Dalaguete, Sugbo.
Si Emmanuel Yap, 55, minyo, namatay sa mga samad pinusilan sa likod sa ulo, ingon man lawas human pusila ginamit ang kalibre .45 nga pistola sa suspek nga giilang si Rosalito “Jojo†Amazona, 53, buwag sa asawa, anak sa nailang politiko sa lungsod nga si manlalaban Armando “Boy†Amazona Jr.
Si Insp. Rico Emperwa, hepe sa Dalaguete Police nga nahinabi sa dySS Super Radyo ug Sun.Star Superbalita, nagkanayon nga ang motibo sa krimen mao ang karaang panagbangi sa duruha sukad pa sa ilang pagkabatan-on.
Gibutyag ni Emperwa nga grabi ang dumot sa duruha hangtod ug natuldokan niadtong Martes sa hapon human gikatahong misulong ang biktima nga hubog sa balay sa suspek.
Ang biktima nga naigo sa lawas sa pagpusil nakadagan pa sa duol sa vulcanizing shop nga gipanag-iya sa iyang amigo nga si Nicolas Obrero.
Nahagba ang biktima apan gigukod sa suspek, giusban sa pagpusil ang likod nga bahin sa ulo hinungdan nga kini nabuak nga maoy nakaingon sa kamatayon.
Human sa pagpusil, si Amazona nahanaw sa maong lugar.
Wa masuta kon unsay gisakyan sa iyang pagsibat diin hangtod ning pagsuwat wa pa siya madakpi.
Si Obrero nga nakakita sa hitabo maoy nipahibawo sa kapulisan ug nipahigayon og hot pursuit operation ug gipa-alarma ang mga silingang police station.
Si Emperwa niingon nga ang duha pulos mga maldito sa ilang lugar ug mga tubigtubigan hinungdan nga mga ilado kaayo.
Ang biktima gikatahong gidunggab na usab kini kaniadto.
Nakuha nila sa crime scene ang duha ka mga kabhang sa bala sa kalibre .45 nga pistola.
Linkback:
https://tubagbohol.mikeligalig.com/index.php?topic=78363.0
