MikeLigalig.com

Ni Jojo C. Ugdol (Banat) | Updated September 15, 2014 - 12:00am


CEBU, Philippines â€" Dead on arrival sa tambalanan ang usa ka 33-anyos nga tattoo artist, human kini gipusil sa usa ka lalaki sa Sitio Anahaw, Buhisan, Cebu City, pasado alas 9 sa miaging gabii.

Ang biktima naila nga si Andrew Tabaque, nagpuyo sa  Campar Village, Buhisan, Cebu City, samtang gitudlong suspek sa pagpamusil si John Jay Abella, taga Guadalupe Village, Punta Princesa, Cebu City.

Nasayran nga nagdula og billiards ang biktima sa maong lugar, dihang kalit lang miabot ang suspek ug dayon may mitumaw nga panaglalis tali sa duha nga misangpot sa sinumbagay.

Apan kalit lang mibunot og armas ang suspek ug dayong pusil sa makaduha ka higayon sa abaga sa biktima.

Dali pa unta nga gidala sa Cebu City Medical Center (CCMC) si Tabaque, apan nakabsan gayud kini sa iyang kinabuhi.

Matud pa ni SPO4 Alex Dacua sa Homicide Section sa Cebu City Police Office nga nahinabi sa Banat News, “love triangle” ang hinungdan sa maong krimen.

Sumala pa ni Dacua nga sa ilang gihimo nga imbestigasyon nasayran nga nagduda ang suspek nga duna’y relasyon ang biktima ug ang iyang ka live-in partner hinungdan nga iyaha kining gikomprontase.

Duda ang kapulisan nga posibling revolver ang gigamit ni Abella sa pagpusil ni Tabaque, gumikan kay wala’y kabhang sa bala ang nakuha sa kapulisan sa crime scene. Padayon pa nga gipangita sa kapulisan ang suspetsado. -/EIM) (BANAT NEWS)