Ni Flor V. Querubin
Monday, March 7, 2011
SAKRISTAN sa Saint Augustine Church, barangay Santa Rosa, isla sa Olango, Lapu-Lapu nipasangil sa ilang kura paroko nga nanagpa ug nanukmag niya kay nasuko sa dihang na-late atol sa misa niadtong Domingo.
Apan si Fr. Leopoldo Palacio nihimakak sa giingong pagpanagmal kay matod pa niya nga iya ra kining gibinata og badlong apan siya niangkon nga nasuko siya sa langay nga pag-abot sa duha niya ka mga aspirant nga sakristan hinungdan nga dugay nga nasugdan ang misa.
Wa magduha-duha ang 15 anyos nga tinun-an sa Sta. Rosa National High School nga gitago sa ngalan nga Jay sa pagpa-blotter sa giingong pagpanagmal ug pagpakauwaw nga gihimo sa Archdiocesan priest kaniya.
Matod niya nga napungot ang pari sa dihang late nga niabot si Jay ilabi na nga magsugod na ang ikaduhang misa sa alas 8:30 niadtong Dominggo sa buntag.
Asoy ni Jay ning tigbalita nga nangandam na sila si Palacio o mas naila nga Fr. Jun ug mga lay minister sa sakristiya sa iyang pag-abot.
Nagdali-dali dayon siya sa pagsul-ob og sutana aron moapil sa paglinya.
Nakurat siya sa dihang gitapik sa pari ang iyang wa nga abaga dayong bunlot sa iyang t-shirt.
Wa pa matagbaw gitamparos ang wa niya nga aping ug sa iyang paglingi og balik gitukmod siya hangtod nga nasarasay siya sa aparador nga nilagubo ug nakapahibulong sa mga manimbahay samtang nag-awit sa entrance song.
Matod pa ni Jay nga sa iyang pagbarog gikan sa iyang pagka-out balance nga gisumbag siya ni Fr. Jun sa iyang kilid ingon sa nawagtangan siya og ginhawa dungan sa pagsuna sa pari nga “unsa man mosukol ka?â€
Gikuyogan ang biktima sa iyang amahan aron ipa-blotter sa Police Station 1 sa Lapu-Lapu City Police Office (LLCPO) ang maong insidente ingon man ang pagpakurasyon sa Olango municipal hospital.
Apan, si Palacio, sa iyang bahin sa dihang nahinabi sa Sun.Star Superbalita, nagkanayon nga na-settle na ang tanan sanglit nipatawag gilayon siya og meeting human sa santos nga misa niadtong Dominggo sa udto.
“Niangkon na sila nga nasayop sila (sakristan). Nangayo sab sila og pasaylo ug nangayo sab ko og pasaylo,†tipik sa pamahayag sa pari.
Wa ilimod ni Fr. Jun nga nasuko siya sa duha niya ka mga sakristan sa dihang nahuman nalang ang duha ka mga entrance songs wa gihapon sila makatunga sa altar ug sa pagpina-abot sa mga sakristan nga late nang niabot.
“Nadisturbo ang misa kay amo silang gihuwat. Nainit pud ko,†dason sa pari.
Ang ikaduhang sakristan gitago sa ngalan Santino nitug-an usab nga human dagmali si Jay sa maong pari, siya maoy gisunod ug gitamparos makaduha ka higayon dayon giyugyog ang iyang ulo tungod usab nga late siya nga mitunga sa misa.
“Dili mahitabo nga ako na silang dagmalan kay mga pinangga ko na sila intawon,†dugang pa ni Palacio.
Linkback:
https://tubagbohol.mikeligalig.com/index.php?topic=41625.0
Topic: Sakristan gitamparos sa pari? (Read 1428 times)