MikeLigalig.com

Ni KRIS C. SIALANA


NAPUNO og pinaakan sa putyukan ang usa ka lalaki samtang namungkag sa balay niini ibabaw sa kahoy niadtong Miyerkules sa Claveria, Misamis Oriental.

Talandugon ang kahimtang sa biktima nga si Allan Andales, ulitawo, lumulupyo sa nahisgutang dapit.

Sa nahipos nga impormasiyon gikan sa Northern Mindanao Medical Center (NMMC), dakbayan sa Cagayan de Oro, nasayran gikan sa asawa sa igsoon ni Andales nga namungkag ang biktima sa balay sa putyukan.

Giingong gisunog niini ang balayan sa putyukan apan wala niini na intimano hinungdan nga gitabangan kini og paak ug pagkahulog gikan sa punoan sa kahoy.

Dili grabe ang naangkon niini nga bun-og gumikan sa pagkahulog apan anaa kini sa talandugon nga kahimtang tungod sa mga naangkon nga pinaakan.

Sa pagsulat niini nga balita, ang biktima ang padayon pa nga gi-obserbahan sa mga mananambal sulod sa NMMC.


Gipatik sa mantalaang Superbalita Cagayan de Oro Abril 22, 2016.