Ni Stephanie Viovicente-Berganio
Wednesday, April 17, 2013
ANAA na sa pagkadugta ang lawas sa usa ka gituohang pulis nga napalgan sa kasagbutan nga bahin sa Macapagal Drive, Upper Carmen ning siyudad sa Cagayan de Oro.
Nadiskubre ang patay’ng lawas kagahapon mga alas 6:00 sa buntag sa mga batan-on nga nag-jogging sa dapit.
Girespondehan sa kapulisan sa Police Station 4 (PS4) sa Carmen pangulohan ni Police Inspector Bernard Collegio ug mga operatiba sa Scene of the Crimes Operatives (Soco) ang maong hitabo.
Sa inisyal nga pagsusi sa kapolisan sa patay’ng lawas, nakita ang Identification Card (ID) nga nagdala sa pangalan nga Police Officer 1 Junal Guro-Magundadato, taga Osmeña, siyudad sa Marawi.
Dili na maklaro ang hitsura sa biktima tungod kay niburot na kini apan nakita ang samad nga gituohang pinusilan sa ulo niini nga milahos sa likod nga bahin.
Gawas sa ID, lakip usab nga nakuha ang tsapa sa pulis nga gituohang iya sa biktima.
Si Collegio nibutyag nga dili pa hinuon nila makumpirma kung kini ba gyod ang nanag-iya sa ID labina wala pay paryente nga nakasusi niini.
Dako ang ilang pagtuo nga gipatay ang biktima ug igo lang gilabay sa maong dapit.
Sa pagsulat ning balita gi-coordinate na sa kapulisan ang siyudad sa Marawi. Samtang gikatakdang ipaubos sa otopsiya ang patay’ng lawas sa biktima.
Gidala na usab kini sa Bollozos funeral parlor ning panahona.
Linkback:
https://tubagbohol.mikeligalig.com/index.php?topic=72026.0
