By Sun Star
HUMAN sa nahitabong mangilngig nga aksidente sa kadalanan, nanimalos karon ang wala mailhing mga armadong tawo ngadto sa mga operator sa "uso-uso" jeepneys nga nagabiyahe dinhi sa siyudad sa Davao.
Mga armadong tawo way kahadlok nga nagdala og armas bisan pa man gipatuman ang Commission on Elections (Comelec) gun ban aron makabawos pinaagi sa pagpusil sa duha ka "uso-uso" jeepneys didto sa Roxas Avenue sa ala 1:45 sa hapon niadtong Lunes.
Unang gipusil sa mga armado mao ang Isuzu Jeep nga dunay plate number LBV-996 ug gipanag-iyahan ni Racman Lingas nga nagpuyo sa Barangay Sirawan, distrito sa Toril.
Si Joe Lao, 30, drayber sa maong jeep, nagbutyag nga gikan sila sa CM Recto paingon sa Roxas Avenue apan gibabagan sila sa duha ka wa mailhing mga tawo dayon gipusil ang jeep sa lima ka higayon.
Maayong pagka-igo sa iyang walang headlight, tuong signal light ug radiator gamit ang .45 kalibre nga pistola base sab sa lima ka baseyo ug upat ka slug nga nahipus sa kapulisan.
Sa unahan nga bahin didto sa Padre Gomez kanto Roxas Avenue, gipusil sab sa duha ka mga armado ang jeep nga dunay plate number LWS-844 nga gipanag-iyahan ni Raul Axalan nga taga St. Jude, Toril, ning siyudad.
Si Arnulfo Suizo, 51, drayber sa maong jeep, nagbutyag sa kapulisan nga gipusil sab sa mga tawo ang armado ang headlight, ug radiator gamit gihapon ang .45 kalibre nga pistola base sa tulo ka baseyo nga nahipus sa kapusilan.
Si PO2 Leo Lozarito sa San Pedro Police Station nagbutyag nga maniid sila sa maong lugar sa pamasin nga mailhan ang mga armadong tawo.
Tungod niini, nangahadlok na ang mga operators ug drivers sa "uso-uso" jeepneys nga basin sila ang isunod sa mga armadong tawo. (AD)
Linkback:
https://tubagbohol.mikeligalig.com/index.php?topic=32521.0