Ni Rey Pasaporte (Banat) Updated June 29, 2012 12:00 AM
CEBU, Philippines - Naguhay-guhay na ang lawas sa bata nga bag-o pang natawo human gipang-it sa iro ang sako nga gisudlan niini nga gituohang tulo ngadto na sa upat ka adlaw nga gilabay diha sa bungtod luyo sa barangay hall sa barangay Lo-ay siyudad sa Toledo kagahapon sa buntag.
Dili na maklaro kun lalaki o babaye ba ang maong puya sanglit naguhay-guhay na man ang lawas niini tungod sa pagpaak sa mga iro.
Si SPO4 Carmelito Hornales sa Toledo City Police Station nga nahinabi sa Banat News sa telepono kagahapon sa hapon nagkanayon nga usa ka Ruffa Alicaba nga residente sa maong lugar maoy nakakita sa iro nga nagkitkit sa sako.
Sa kakuryoso niini gisusi niya kini ug nakurat nalang siyang batang bag-o pang natawo ang sulod niini hinungdan nga mitawag siya sa mga awtoridad.
Si Supt. Henry Biñas, hepe sa Toledo City Police Station uban sa iyang mga sakop daling miresponde sa maong lugar ug ilang nasuta nga gawas sa bata, diha usab sa sulod sa sako ang usa ka habol, short pants, plastic bag nga gituohang maoy giputos sa bata.
Si Dr. Hermes Labrador ang medico-legal officer diha sa dakbayan sa Toledo mitug-an sa kapulisan nga gibanabanang usa ngadto sa duha ka adlaw pa ang maong puya dihang kini namatay apan upat na ka adlaw una kini napalgan.
Ang kapulisan sa Toledo padayong nihimo sa ilang imbestigasyon aron mailhan ang responsable sa paglabay sa maong bata. (/EIM) (BANAT NEWS)
Linkback:
https://tubagbohol.mikeligalig.com/index.php?topic=51973.0
Topic: Patay nga bata gisulod sa sako gipang-it-pang-it sa iro guhay-guhay ang lawas (Read 688 times)