Ni Jeepy P. Compio
Thursday, February 7, 2013
USA ka pastor ang gibalhog sa selda sa San Pedro Police Station human gireklamo sa usa ka commercial sex worker tungod kay gibayaran siya og peke nga salapi alas 4:00 kagahapon sa kadlawon, Huwebes.
Gireklamo mao si Clint Abib Tan Autida, 25, minyo, residente sa Emerald Street, Phase I, Dejo Subdivision, Barangay Cabantian, Buhangin District, siyudad sa Davao.
Si Autida mao ang pastor sa Grace Gospel Church of Christ didto sa Cabantian.
Gisaysay sa kapulisan sa San Pedro nga gireklamo ang pastor sa sex worker nga gitago sa pangalang Grace.
Nasayran nga kagahapon sa kadlawon nangita si Autida og babaye nga molingaw kaniya ibabaw sa kama didto sa Central Bank sa dalang Claudio, ning siyudad.
Nakigsabot ang maong pastor sa bugaw nga gitago sa pangalang Gerry aron makauban si Grace.
Human nagkasinabot sa presyo, gihatag sa pastor ngadto kang Gerry ang P600 isip bayad sa babaye.
Human gidawat ang maong kantidad, nagkuyog dayon sila Grace ug Autida sulod sa usa ka lodging house sa dalang Duterte, ning siyudad.
Nasuta sa bugaw nga pulos peke ang tag P100 nga gibayad kaniya gikan sa pastor mao nga nangayo siya og police assistance.
Giadto sa mga pulis ang pastor sa lodging house diin sab nasuta sa babaye nga peke ang gibayad kaniya sa suspek.
Gikapkapan sa mga pulis ang pastor kinsa nakuhaan og pulos peke nga kuwarta nga nagkantidad og P13,450.
Gipanghimakak sa maong pastor ang pasangil kaniya sanglit ang maong kuwarta gikan lamang sa iyang higala nga mibayad sa dugay nga nga utang kaniya.
Ang pastor gikustodiya sa kapulisan samtang naghuwat sa pormal nga reklamo nga ipasaka batok kaniya ngadto sa korte.
Linkback:
https://tubagbohol.mikeligalig.com/index.php?topic=71576.0
Topic: Pastor nakig-sex gisikop kay peke ang kwartang gibayad (Read 1490 times)