Ni Darrel Carumba (Banat) Updated June 26, 2011 12:00 AM
CEBU, Philippines - Usa ka paralisadong lalaki kinsa giingong gibati na og kalaay sa iyang kahimtang naghikog sa punoan sa mangga didto sa Sityo Sun-ok, barangay San Jose lungsod sa Catmon sa miaging gabii.
Ang nagpakamatay mao si Amid Sayod Roble Jr., 26, ulitawo apan adunay kapuyo, paralisado nga nagpuyo usab sa nahisgutang lugar.
Si PO3 Juannario Sudaria sa Catmon Police sa pakighinabi sa Banat News mibutyag nga ang amahan nga si Amid Sayod Sr., mao nay nakadiskobri sa patay’ng lawas sa iyang anak nianang pagka alas 5:00 sa buntag.
Ang patay’ng lawas didto sa ilawom sa punoan sa mangga nga nagbitay nga nagdiwalwal ang dila nga adunay higot nga pisi ang liog kansang pikas tumoy didto igaid sa sanga sa mangga.
Dugang nahipos nga impormasyon sa kapolisan nagkanayon nga si Amid Jr. tulo na ka higayong misuway sa pakamatay pinaagi sa paghikog apan kanunay nga mapakgang sa iyang mga ginikanan.
Apan sa miaging gabii wala na kini mabantayi kay didto kini maghikog ilawom sa punoan sa mangga nga distansiya sa ilang balay. Adunay nahipos nga report ang kapolisan nga matud pa, usa sa gikagul-an ni Jr. Amid mao ang kanunay nilang panaglalis tali sa iyang kapuyo kansang ngalan wala makuha.
Ang kabanay ni Jr. Amid nagtuo nga ang kahimtang sa panglawas niini maoy nakapapugos kaniya nga magpakamatay.(WC) (BANAT NEWS)
Linkback:
https://tubagbohol.mikeligalig.com/index.php?topic=41939.0
