Ni Sheila C. Gravinez
Sunday, June 26, 2011
SIKYU sa usa ka pribadong establisemento ang gidakop ug gibalhog sa bilanggoan sa kapulisan sa Pardo kagahapon sa hapon tungod sa giingong pagmolestiya sa usa ka tinun-an sa Grade 6.
Ang 12-anyos nga biktima nagtungha sa usa ka elementarya sa habagatan sa dakbayan sa Sugbo nagdanguyngoy nga nisumbong sa kapulisan sa Pardo Police Station.
Giubanan ang biktima sa iyang amahan ug representante sa gender and development sa barangay pasado ala 1 sa hapon kagahapon.
Si PO1 Ranier Rama sa Pardo Police Station niila sa suspek nga si Rey Ann Antonio, 26, taga lungsod sa Minglanilla apan kasamtangan nga nagpuyo sa balay sa biktima ug sakop sa Recarte Security Agency nga nadistino sa usa ka ukay-ukayan sa dan Colon ning siyudad.
Asoy sa amahan sa bata ngadto sa kapulisan nga nisumbong ang iyang menor-de-edad nga anak nga samtang nangatulog sila sa miaging gabii, giingong nakabantay kini nga gikuot ni Antonio ang iyang kinatawo gamit ang tudlo niini.
Matod ni Rama nga pagmata sa biktima kagahapon sa buntag, nakabantay kini nga sakit na ang iyang kinatawo sa dihang siya nangihi.
“Nakabantay siya nga gikuot ang iyaha samtang sila nangatulog tungod kay usa ra man ang ilang higdaanan unya wa may ali. Unya pagmata niya kaganinang buntag sakit na ang iyaha sa dihang siya nangihi,†asoy ni Rama sa pakighinabi sa Sun.Star Superbalita kagahapon.
Si Rama niingon nga sa sinugdanan nahadlok ang bata nga mosumbong ngadto sa iyang mga ginikanan sanglit ang suspek amigo sa iyang amahan ug kauban ra usab og security agency niini.
Siya nidugang nga sud na sa kapin usa ka buwan nga gipapuyo sa amahan sa biktima ang suspek sanglit naluoy kini nga layo ang gipuy-an niini sa iyang gitrabahoan.
Ang batang biktima ipa-examine sa kapulisan sa Pink Room sa Vicente Sotto Memorial Medical Center (VSMMC) aron masuta kon nahilabtan ba kini sa suspek.
Si Rama nidugang nga desidido ang kabanay sa biktima nga mopasaka og kaso batok ni Antonio.
Ang suspek wa pa moluwat og pamahayag.
Gipatik sa mantalaang SuperBalita Cebu Hunyo 27, 2011. Linkback:
https://tubagbohol.mikeligalig.com/index.php?topic=41943.0
