Ni Jojo C. Ugdol/EIM (Banat) | Updated May 29, 2015 - 12:00am
CEBU, Philippines - Patay nang nadangat sa tambalanan ang usa ka lalaki human kini sulay pagpakgang sa iyang half- brother nga retiradong opisyal sa kapolisan nga padung untang maghikog kay siya maoy napusilan sa dughan.
Ang insidente nahitabo sa Barangay Mantayupan lungsod sa Barili sa nakalabay nga gabii.
Ang namatay naila nga si Giovani Bontilao, 44, samtang ang nakapusil kaniya mao si retired police Inspector Antonio Cervantes, 54, nagpuyo sa maong lugar.
Matud pa ni Sr. Insp. Julius Ompad, hepe sa kapulisan sa lungsod sa Barili nga nahinabi sa Banat News katapusang nadestino si Cervantes sa Mandaue City Police Office ug mi-avail kini sa optional retirement.
Sa imbestigasyon sa kapulisan ilang nasayran nga kauban ni Cervantes ang iyang duha ka mga half-brothers nag-inom niadtong higayona nga sila si Glenn ug Giovani Bontilao nga maoy nitrabaho sa gipatukod niining balay.
Matud pa unang mipauli si Glenn apan pipila ka minutos ang milabay usa ka buto sa armas ang ilang nadungog, nasuta nga nagpabuto niini si Cervantes ug sunod gibuhat ang pagtion sa armas niini tumong sa iyang tampihak.
Daling gilayatan ni Giovani ang igsuon aron kini pugngan apan nibuto kini ug naigo ang palad ni Cervantes, apan nilapos ang bala sa kilid sa lawas ni Giovani.
Ang duha daling gidala sa Barili District Hospital apan namatay si Giovani samtang si Cervantes ang gibalhin og laing tambalanan sa siyudad sa Sugbo.
“Frustration daw sa kinabuhi ang iyang nahinumdoman,†matud pa ni Ompad human niya naestorya ang retiradong polis. Wa makuha sa mga polis ang armas apan nakakuha sila’g basiyo sa bala sa kalibre .45 sa crime scene. Gipaabot pa kun dunay mopasaka og kaso sa mga igsuon ni Cervantes. (BANAT NEWS)
Linkback:
https://tubagbohol.mikeligalig.com/index.php?topic=80065.0
