By Alger Dura, Sun Star
Usa ka tawo nga dunay kasong rape ang namatay human misukol sa mga pulis nga miaresto kaniya sa alas 7:00 sa gabii niadtong Martes didto sa Barangay Mandug, distrito sa sa Buhangin, siyudad sa Davao.
Si Senior Police Officer 3 Efren Misamin sa Buhangin Police Station nag-ila sa namatay nga mao si Antonio Dandoy, 45, minyo, nagpuyo sa Purok Danao, Upper Mandug, distrito sa Buhangin.
Matud ni Misamin nga gitakdang sikupon unta ang suspetsado sa mga pulis apan misukol siya pinaagi sa pagpamusil gamit ang .38 kalibre nga rebolber.
Sanglit abtik ang mga pulis, wa sila maigo sa pagpamusil sa suspetsado mao nga mibalos sila aron di mamiligro ang ilang kinabuhi.
Si Dandoy nakaangkon og samad sa iyang dughan hinungdan nga siya namatay.
Mga pulis nga gipanguluhan ni Police Chief Inspector Alfredo Baloran miadto sa nahimutangan sa suspetsado sa Purok Danao, Upper Mandug tungod kay ilang sikupon pinaagi sa gahum sa warrant og arrest nga gipaguwa sa korte.
Ang tulo ka ihap nga kasong lugos nakadoket sa criminal case number 59, 949-06, 59-951-06 ug 59,951-06 nga gipaguwa ni Judge Albarracin sa Regional Trial Court (RTC).
Linkback:
https://tubagbohol.mikeligalig.com/index.php?topic=34495.0