Wednesday, April 20, 2011
GIREKLAMO ang usa ka albularyo sa iyaan sa iyang pasyente kinsa namatay niadtong ika-17 sa Abril ning tuiga.
Gireklamo mao si Bobong Anilos kinsa mipasalig nga iyang ayuhon ang na-comatose nga si Regine Samm Miclat, nagpuyo sa Lubogan, distrito sa Toril, ning siyudad.
Si Anilos gireklamo sa iyaan sa biktima nga si Ofelia Amo, 48, nagpuyo sa Purok 5, Barangay Lubogan.
Midangop sa Sta. Ana Police Station si Amo aron ipatala ang pagpangilad kanila ni Anilos kinsa nangayo kanila og P15,000.
Base sa blotter sa kapulisan, nagbutyag si Amo nga niadtong Abril 10 miadto sila sa buhatan ni Anilos sa dalang Ponce, Barangay 28-C Poblacion.
Sa maong opisina gidala nila ang pipila ka lugas sa buhok ug t-shirt sa iyang pag-umangkon aron ampoan sa albularyo, suma ni Amo.
Giingon nga gitambagan sila ni Anilos nga pagawason sa San Pedro Hospital ang ilang pasyente kay wa maayo sa mga tambal nga gidapat kaniya sa mga doktor.
Nagkanayon ang albularyo nga aron masugdan na ang pagtambal niya sa biktima, kinahanglan nga mobayad sila sa kinse mil pesos aron maayo ang biktima.
Tungod niini, aron masugdan ang pagpanambal sa albularyo, mibayad ang kabanay sa biktima sa kantidad nga P9,000 ubos sa pasalig nga mamaayo ang biktima.
Suma ni Amo, imbes maayo ang biktima, namatay hinuon ang iyang pag-umangkon ug wa na mipakita kanila si Anilos.
Gipangita sa Superbalita ug dxRA Radyo Arangkada ang buhatan ni Anilos apan wa na siya sa maong lugar sigun ni kanhi Davao Oriental Board Member ug broadcaster Jess Pauliño.
Nagkanayon si Pauliño nga didto nag-opisina si Anilos sa iyang giabangan nga building apan tua na sa Cebu City ang nauwahi sanglit dunay giatiman nga pasyente. (Alger Dura)
Linkback:
https://tubagbohol.mikeligalig.com/index.php?topic=40331.0
