Ni Stephanie Viovicente-Berganio
Thursday, July 26, 2012
NA-OSPITAL ang duha ka mga lalaki human nakiglayog sa dako kaayo nga sawa niadtong Miyerkules sa buntag sa Panatag, probinsya sa Bukidnon.
Nagpatambal ang mga biktima nga mao sila si Danny Maitom, 35, ug si Boy Bagwis, 29, residente sa susamang dapit sa Northern Mindanao Medical Center (NMMC) ning siyudad sa Cagayan de Oro.
Saysay ni Maitom nga nagkuha sila niadtong tungora og kalabasa sa uma dihang kalit lang niyang namatikdan ang presensya sa labihan kadako nga sawa nga nag-atubang ug mi-aksyon ug paak kaniya.
Tungod kay wala siya makadala og sundang o mahait nga hinagiban niadtong tungora, wala na gihulat ni Maitom nga motukob pa kaniya ang maong sawa ug diretso niya’ng giambakan ang ulo niini ug gisakyan.
Apan kusgan ug abtik kaayo ang sawa nga milikos sa iyang tibuok lawas hinungdan sa pakiglayog niini kang Maitom. Nasakitan ang biktima dihang gibalikosan ug giipit siya niini. Nahadlok usab siya tungod kay dili na siya makaginhawa pa. Maayo na lamang og nakasiyagit siya mao nga nadungog siya ni Bagwis.
Midagan dayon si Bagwis nga nagdala ug sundang apan namatikdan kini sa sawa og gilabtikan dayun siya sa tumoy sa ikog niini. Deretsong gitigbas ni Bagwis ang sawa ug giputlan kini og ulo.
Saysay ni Maitom nga nagluya siya ug murag nangaipit ang iyang bukog, apan mapasalamaton kini sa iyang kauban nga miluwas kaniya tungod kay dako ang posibilidad nga iyang ikamatay ang maong sitwasyon.
Luwas na sa makuyaw nga kahimtang ning panahona ang mga biktima.
Giingong ang napatay nga sawa gi-adobo ug gikaon na sa pamilya sa mga biktima.
Linkback:
https://tubagbohol.mikeligalig.com/index.php?topic=53124.0