SuperBalita Davao
Friday, June 14, 2013
DAVAO CITY - Patay na nga nakaplagan ang usa ka lalaki human naghikog sa dihang nasakpan ang iyang kapuyo nga dunay laing kasawo sa tawhanong kalipay.
Ang insidente nahitabo alas 8:00 sa buntag niadtong Huwebes didto sa Dumalag 2, Matina Aplaya, siyudad sa Davao.
Biktima giila lang sa ngan nga Danny, (bansagon gitago), 35, traysikad drayber sa Barangay 22-C, Piapi Boulevard ning siyudad ug lumad nga taga Malita, Davao del Sur.
Suma sa spot report sa Talomo Police Station, nasayran nga nakita ni Daniel, 10, (anak sa biktima) ang iyang amahan nga nagbitay nga wala na'y kinabuhi sa door jamb sa ilang gipuy-an.
Gigamit sa paghikog sa biktima mao ang nylon rope nga gihigot ang pikas tumoy sa iyang liog ug ang laing tumoy gilambod sa taas nga bahin sa door jamb.
Nasayran nga sa wala pa mahitabo ang paghikog, ala 1:00 sa kaadlawon sa maong adlaw, nakita matud pa sa namatay ang kapuyo kinsa gitago lang sa ngan nga Madel, naay kaubang lalaki nga milabay sa ilang balay.
Nasayran sa tigsuwat gikan sa mga higala sa biktima didto sa Barangay 22-C nga gisundan sa biktima ang kapuyo alas 2:00 sa kaadlawon uban sa lalaki ug siya mismo nakasaksi sa duruha nga mainitong nagsawo sa dili-ikapanangpit nga kalipay.
Tungod sa hitabo, iyang gisultihan ang iyang mga kaila sa pagluib sa iyang kapuyo.
Buntag na sa kaadlawon miuli ang biktima sa ilang balay didto sa Matina Aplaya ug didto na nahitabo ang iyang paghikog.
Walay nakitang bun-og sa kalawasan ang mga personahe sa Scene of the Crime Operatives (Soco) gawas lamang sa labhag sa liog nga agi sa hinigtan sa nylon nga pisi.
Patay nga lawas sa biktima gihaya na sa ilang panimalay. (Jeepy P. Compio)
Linkback:
https://tubagbohol.mikeligalig.com/index.php?topic=73454.0