NAGBAYAD SA UTANG GIKULATA, GIDUNGGAB
ORMOC CITY - Nakaangkon og bun-og sa lawas ug samad dinunggaban sa kamot ang usa ka lalake human gikulata sa Purok 5, Barangay Bantigue, Ormoc City.
Ang insidente nahitabo alas 8:30 sa gabie, Sabado, Oktubre 22, 2022.
Giila ang biktima nga si Junrey Cetatoc, 29, taga Purok 5, Barangay Bantigue.
Samtang ang mga suspek giila nga si Rogelio Ruiz, 48, nagpuyo sa samang lugar ug usa ka 17 anyos nga lalake.
Matod sa kapulisan, ang biktima nagbayad sa iyang utang sa usa ka tindahan sa dihang kalit nga niabot ang duha ka suspek ug gikulata ug gidunggab sa sundang ang biktima ug naigo sa kamot.
Dugang pa sa kapulisan, nailog sa biktima ang sundang gikan sa suspek ug gidepensahan iyang kaugalingon.
Gilunsad sa kapulisan ang hot pursuit operation ug nadakpan ang duha ka suspek ug ang 17 anyos dad-on sa Social Welfare Office.
Personal nga kasuko ang gitumbok nga rason sa krimen.
Naa na sa kustodiya sa kapulisan ang usa ka suspek ug gikatakda nga pasakaan og kaso. (John Kevin Pilapil)
* * *
Avail of easy and fast online loan at
www.tala.com Philippines
Linkback:
https://tubagbohol.mikeligalig.com/index.php?topic=123303.0