Ni Darrel A. Carumba/WC (Banat) Updated March 18, 2012 12:00 AM
CEBU, Philippines - Nangabun-og ang duha ka tanod human sila kulataha sa mga tawong ilang gibadlong nga nakiglalis sa tag-iya sa usa ka kan-anan didto sa Paras St., Poblacion siyudad sa Carcar niadtong Biyernes sa 1:05 sa kaadlawon. Ang mga biktima mao sila si Carlos Villaflor, 38, ulitawo, ug Quirino Dabon, 50, minyo, pulos mga tanod sa maong lugar.
Samtang ang mga suspek mao sila si Raymund Manacio, 21, ulitawo, Ramy Roque, 24, ulitawo ug Brando Manacio, 30, minyo ug pulos taga barangay Cangdangpas, Barili.
Si PO1 Richard Cababat, desk officer sa Barili Police Station mibutyag sa Banat News nga ang mga biktima kauban ang ilang hepe sa tanod nga si Edson Saqan ug mga kaubanan nag-patrolya sa palibot sa merkado sa lungsod niadtong higayona.
Apan ilang nadiskitaan ang mga suspek nga nakiglalis sa tag-iya sa karenderia nga ilang gikan-an hinungdan nga gisusi dayon kini sa mga biktima.
Apan dihang ilang gibadlong ang mga suspek, nangasuko kini ug gidasmagan sila dayon gipangulata hinungdan nga nabulit sa bun-og ang ilang kalawasan.Gawas sa bun-og samdan sa bukton si Villaflor human kini paaka ni Manacio samtang giilog usab ni Brando ang batota ni Dabon ug mao kini iyang gipuspos ug gilatigo sa kalawasan lakip na bukobuko sa maong tanod.
Gumikan sa kakusog sa pagpamunal, nabali ang batota ni Dabon sa iyang lawas.
Misangpot sa karambola ang maong away dihang mitabang ang mga kaubanang tanod sa mga biktima ug misikop sa mga suspek.
Gitugyan nila kini sa kapolisan kinsa maoy mipaslak niini sa prisohan samtang gihikay usab dayon ang tukmang kaso nga isang-at batok kanila.
Ang mga naangol nga tanod gihatod dayon ngadto sa tambalanan. (BANATNEWS)
Linkback:
https://tubagbohol.mikeligalig.com/index.php?topic=48419.0