Ni Guam P. Logroño
Friday, November 11, 2011
NASUGBA ang 81 anyos nga tiguwang nga mag-uuma nga naabtan sa iyang asawa nga nag-aso ug wa nay kinabuhi sa iyang umahan niadtong Huwebes sa alas 11 sa buntag sa bukirang dapit sa Barangay Mayana, lungsod sa Barili, habagatang kasadpan sa Sugbo.
Si Jacinto Escultor, minyo, nagpuyo sa maong dapit, nag-aso ang lawas niini sa usa ka daob nga daghang mga sanga sa kahoy ug dahon dihang naabtan sa iyang asawa nga si Barcelisa.
Si SPO1 Job Sarvida, desk officer sa Barili police nga nahinabi sa Sun.Star Superbalita, nagkanayon nga alas 5:40 sa hapon niadtong Huwebes, na-report ang insidente sa police station sa anak nga si Catalino, 54.
Matod ni Catalino nga ang iyang inahan nga si Barcelisa niingon nga ang iyang amahan nibiya sa ilang balay mga alas 8 sa buntag kay niadto sa ilang umahan aron sa pagtikad.
Ang iyang inahan nangumpra usab sa merkado publiko sa lungsod, apan sa pag-abot niini sa ilang balay mga alas 11 sa buntag, giapas gilayon niya ang biktima sa umahan.
Sa pag-abot ni Barcelisa, maoy nakit-an niini nga nag-aso na ang iyang bana diha sa daob tipon sa daghang mga dahon ug sanga sa kahoy nga nagbaga nga pwerting pagkapaiga.
“Nasinugba siya didto kay hinay naman gud ni siyag lihok. Nagtuo ang kabanay nga aksidente kining natumba sa pagpanaob niya ug didto mapunta sa nagbagang kayo sa gidauban niining mga kahoy,†dugang ni Sarvida.
Wa nay nahimo ang asawa sa pagtabang sa iyang bana nga napaig nga nag-aso ang lawas nga nakaangkon og 3rd degree burns sa nagbagang daob.
Hinuon ang pamilya nisalikway sa mga pagduda nga dunay fuol play ang kamatayon sa biktima sanglit nagtoo silang aksidenti lang gyud kining hitabo samtang nag-inusara sa iyang umahan.
Way mga silingan nga nakakita sa biktima sanglit lagyo kaayo ang mga balay apan nakapakurat kining maong insidenti sa mga lumolupyo sa maong lugar.
Gipasabot n Sarvida nga kining impormasyon nga ilang nakuha gikan lang sa version sa anak nga maoy nagpa-blotter sa insidente.
Apan bisan paman niini sila wa mohunong sa ilang imbestigasyon labot sa kaso sanglit mohimo pa silag dugang pagsukitsukit.
Ilaha pang tan-awon kon wa bay gikabangi ang biktima bisan tuod kon way gibutyag niini ang mga kabanay sa biktima labot sa land dispute. --
Gipatik sa mantalaang SuperBalita Cebu Nobiembre 12, 2011. Linkback:
https://tubagbohol.mikeligalig.com/index.php?topic=44247.0
