Ni Guam P. Logroño
Tuesday, February 21, 2012
LOLO namatay sa pagkasunog sa iyang balay kay naamong sa mga lampinig nga iyang gidauban sulod sa iyang pinuy-anan kagahapon sa ala 1 sa hapon sa Sitio Hantik, Barangay Babag dakbayan sa Sugbo.
Si Alfonso Lopez, 75, mag-uuma, nakagawas na unta sa iyang balay nga nasunog apan nibalik kay nagkuha sa kaldero kay gigutom kay wa pa siyay paniudto hinungdan nga naapil siya pagkasunog.
Si Brgy. Konsehal Timoteo Gabisay nagkanayon nga ang biktima nagkuhag langkay sa lubi aron dubduban ang daghang mga lampinig nga nagpuyo sa marko sa kawayan sa bongbong sa iyang balay.
Sa pagsige niyag dubdub, nisilaob pag maayo ang kaso sa langkay ug nidakop sa gaay kaayong bongbong nga kawayan.
Apan bisan pa man sa pagsilaob niini gipusposan lang sa tiguwang sa gidalang langkay ang kayo hinungdan nga nisamot sa pagdilaab.
Ang mga silingan nga nakakita nisinggit pa kaniya nga magdalig gawas kay kusog na kaayo ang pagdilaab.
Giingong nakagawas gyud sa balay, apan ang mga silingan nakurat kay nibalik kini sa iyang agi aron iyahang kuhaon ang kaldero didto sa kusina.
Gipatik sa mantalaang SuperBalita Cebu Pebrero 22, 2012.
Linkback:
https://tubagbohol.mikeligalig.com/index.php?topic=47669.0
