by Brigada News
Lima ka balay ang naugdaw sa sunog human nabuhian sa 5 anyos nga bata (pangalan gipugngan) ang nagdilaab nga palito sa posporo nga iyang gikadlit samtang nagdula.
Unang misilaob ang panimalay ni Rosalie Pacyao sa Purok Tinago 24, Barangay Dadiangas West ning siyudad nga mikatag ngadto sa mga silingan.
Sumala ni Epraim Beliran sa City Disaster Risk ReductionManagement Council (CDRRMC), lima usab ka mga pamilya ang apektado sa maong sunog.
Sa imbestigasyon ni Arson Investigator, FO2 Rey Allan Imperio sa Bureau of Fire Protection - General Santos, nagsugod ang sunog sa ikaduhang andana sa payag nga gipuy-an sa nahisgutan human gibiyaan kini nga walay tawo.
Usa lamang ka bata nga nagpangidaron ug 5 anyos ang matud pa milabay sa palito sa posporo nga nagsiga tungod kay napaslot ang iyang kuyamoy sa dihang iya kining gikadlit samtang nagdula sa maong butang.
Naglisod usab ang mga bombero nga sudlon ang lugar tungod sa kahuot sa dalan ug dikit ang mga balay nga gama sa light materials.
Mismong ang mga residente na lamang ang mihimo sa pagpatay sa kalayo gamit ang balde-baldeng tubig gikan sa dagat.
Gibanabanang mukabat sa P150 mil ang danyos sa naasoy nga sunog.
Ang mga apektadong pamilya ang giila sa Barangay Dadiangas West nga silang Rose Pacyao, Analiza Sujion, Pablia Oracion, Cita Cuaton ug Meling Redoble.
Segun ni Ayeng Acharon, Barangay Kagawad sa Dadiangas West, adunay temporaryong kabalhinan ang mga pamilyang apektado ngadto sa ilang barangay.
Dako ang pasalamat sa mga miyembro sa BFP –Gensan ug mga opisyales sa Barangay tungod walay namatay o naangol sa maong panghitabo. (Roland Ortillano)
Linkback:
https://tubagbohol.mikeligalig.com/index.php?topic=41197.0
