Ni Joy F. Tumulak
Thursday, March 31, 2011
LANGYAW gipatay sa lima ka mga tawo, sagad kanila mga tinun-an, sulod sa apartment nga iyang giabangan pasado alas 9 sa miaging gabii sa dalan Sanciangko, dakbayan sa Sugbo.
Selos ug ang pinugos nga pagpakighilawas ang giingong motibo sa usa ka batan-ong babaye nga menor nga gituohang mastermind sa krimen.
Atol sa follow-up nga gihimo sa kapulisan, ang duha sa lima ka mga suspek, usa kanila ang babaye, nasikop sa kapulisan diha sa crime scene.
Ang namatay human makaangkon og daghang mga samad pinusilan mao si Leamon Wesley Casteen Jr., 76, taga South Carolina, Estados Unidos, ug kapin na sa duha ka tuig nga nagpuyo dinhi sa Sugbo.
Napalgan sa kapolisan sa crime scene ang usa ka kalibre .45 nga pistola ug usa ka kalibre .38 nga revolver uban sa mga bala, kabhang sa mga bala ug deformed slugs nga gituohan nga gikan sa duha ka mga armas.
Ang nadakpan kay naabtan sud sa apartment mao sila si “Daryl,†17, tinun-an sa 2nd year high school, taga Tungkop, Minglanilla, ug si “Lovely,†16, graduating sa high school, taga Alaska, Mambaling, dakbayan sa Sugbo.
Sila si Daryl ug Lovely ningtumbok sa ilang kauban nga si Jordan Cyril Galliste, 20, 2nd year college sa kursong Bachelor of Science in Marine Transportation (BSMT), taga Tungha-an, Minglanilla, nga maoy gunman.
Laing kauban nila ilang giila nga sila si Aldez Flores, alias “Boboy,†27, ug si “Ivy,†16, taga Alaska, Mambaling graduating sa high school, giingong uyab sa langyaw ug maoy mastermind sa krimen.
Giingong si Casteen dunay duha ka mga hinigugma.
Gawas kang Ivy, gipuyo sab niini sud sa duha ka mga tuig si Catherine, 17.
Sa pasiuna nga imbestigasyon nila ni SPO4 Alex Dacua, PO2 Jodan Batocan, PO2 Edario Manatad ug PO2 Michael Cudaste sa Homicide Section nagbutyag nga ningsulod ang lima ka mga suspek sa Sanchez Compound diin nagpuyo ang langyaw.
Niadto sila sa 2nd floor diin didto mahimutang ang kwarto sa biktima.
Ningsulod sila si Galliste ug Lovely, dayon ilang gipusil makadaghan ang biktima nga nag-inusara sulod sa iyang lawak.
Human sa pagpamusil, ningsibat gilayon sila si Galliste ug Ivy dayon ni nisunod si Flores.
Tungod sa ilang karatol sa mga buto ug pagpanggawas sa mga tawo nga nakakita kanila, sila si Lovely ug Daryl wa na makadagan mao nga naabtan sa kapulisan nga ningtubag sa alarma.
Si Lovely nga nahinabi sa Sun.Star Superbalita niingon nga sa miaging adlaw giplano ni Ivy ang pagpatay sa biktima tungod sa iyang kalagot.
Pipila ka minutos sa wa pa ang krimen, ilang nahimamat si Flores nga nagdala na daan ug usa ka knapsack nga maoy gisudlan sa mga armas sa gawas sa usa ka dakung tindahan sa eskina Colon ug Borromeo.
Kuyog ni Flores si Galliste, kinsa gisugo ni Ivy sa pagpatay sa biktima, apan wa pa sila magkasinabot sa presyo.
Dugang nasayran gikan ni Lovely nga suod sila nga higala ni Ivy.
Ang iyang amiga nasuko sa langyaw kay namugos sa pagpakighilawas kaniya sa dihang didto siya sa apartmnent sa langyaw sa miaging semana.
Tungod sa pagbalibad ni Ivy, gibuyboy siya sa langyaw sa dako na niyang nagasto sa iyang pagtungha ug uban pang mga galastuhan.
Misamot ang kalagot niini human siya gipasanginlang nangawat sa kwarta sa maong langyaw sulod sa apartment.
Apan si Catherine, 17, kaipon sa langyaw sulod sa duha ka tuig ug niabot gikan sa tunghaan, niingon nga mosulod lang sa apartment si Ivy nga manguha sa kwarta sa iyang kaipon.
Iyang giangkon nga samtang nag-ipon sila sa langyaw, naa usab sa lawak si Ivy uban kanila.
Ang kapolisan pinangulohan nila ni Chief Inspector George Ylanan, Senior Inspector Rex Campos sa MPG, Senior Inspector Reneiro Agustin sa Station 5 ug mga sakop sa Homicide Section, mihimo og hot pursuit operation, apan wa na nila makit-i pa ang mga suspek.
Gipatik sa mantalaang SuperBalita Cebu Abril 01, 2011. Linkback:
https://tubagbohol.mikeligalig.com/index.php?topic=39712.0
