Ni Lesley Caminade-Vestil (Banat) Updated March 26, 2011 12:00 AM
CEBU, Philippines - Maayong pagkalagpot sa usa ka 3-anyos nga batang lalaki human kini mabangga-i sa usa ka motorsiklo pasado ala-una sa miaging hapon sa barangay Bagasawe lungsod sa Tuburan.
Ang biktima nailhan nga si Dave Santillas Peñas, 3, molupyo sa sitio Tapon sa maong barangay samtang ang suspetsado nailhan usab nga si Bayani Arnado Guarin, 23, taga sitio Ylaya barangay Putat sa maong lungsod.
Sa imbestigasyon sa kapolisan nasayran nga ang biktima uban sa iyang mga higala nagduwa daplin sa karsada atbang sa ilang panimalay dihang giingong milabang kini sa dalan atol sa pag-agi ni Guarin. Uwahi na makabantay si Guarin ug napunggit ang bata hinungdan sa pagkalagpot niini apan imbes nga mohunong aron tabangan ang bata si Guarin misutoy hinuon og padagan pag-ikyas.
Ang bata, daling gitabang sa mga residente apan nakabsan na gayud kini sa iyang kinabuhi.
Sa pakighinabi sa Banat News ni PO2 Jennifer Po-Ong, sa Women’s Desk sa Tuburan Police mibutyag ilang nadakpan si Guarin sa gihimong hot pursuit operation diha sa ilang pinuy-anan.
Wala hinuon siya mohimakak nga nadasmagan niya ang bata ug mibutyag nga miikyas siya tungod sa kahadlok nga pasipad-an sa mga residente ug kabanay sa bata. (BANAT NEWS)
Linkback:
https://tubagbohol.mikeligalig.com/index.php?topic=39464.0
