SuperBalita Cebu » Balita
Sunday, April 27, 2014
USA ka negosyante nga nagsakay sa atop sa jeep nabitik sa kutay sa wire sa telepono sa dalan ug nahagbong, patay.
Nahitabo kini sa dalan sa Barangay Ilaya, lungsod sa Ronda sa habagatan sa Sugbo, alas 4:45 sa kaadlawon kagahapon.
Ang biktima mao si Lope Langomis, 56, minyo, negosyante og mga hayupan ug taga Barangay Malalay, Ronda.
Gideklarar siya nga dead-on-arrival (DOA) sa Barili District Hospital sa silingang lungsod tuÂngod sa grabing kadaot sa iyang ulo dihang nabunal sa karsada.
Si PO2 Marivel Pardo, desk officer sa Ronda Police nga nahinabi dySS Super Radyo ug Sun.Star Superbalita, niingon nga ang negosyanÂte padulong mosimba sa lungsod sa Dumanjug uban sa iyang mga parÂyente ug mga silingan.
Nagmerida kaha ang biktima human didto gyod sa atop sa jeep biÂsan gibadlong na, matod ni Pardo.
Dugang ni Pardo, samtang nagdagan ang jeep ug hapit na maabot sa highway kalit lang milugapak sa pagkahagbong ang biktima ngadto sa karsada hinungdan nga nakaangkon og grabing kadaot sa ulo.
Gikatahong wala makabantay ang biktima sa wire, lakip ang drayber, human ngitngit pa niadtong higayuna hinungdan nga maayong pagkabitik sa liog niini sa telepone wire nga nagÂyongyong sa karsada.
"Pwerting kalita sa hitabo pero gibadlong man daw ni siya daan sa mga kauban nga ari sa sulod molingkod pero gusto man gud niyang adto sa ibabaw magpahangin," dugang ni PO2 Pardo.
Gipadayag niini nga naandan na sa biktima nga ganahan gyud ngadto sa ibabaw sa jeep molingkod kay naanad na kini labi na sa panahon nga mamalit kini og mga hayop diha sa bukid.
Ang mga kauban niini lakip ang drayber nga si Abel Ballena 34, nidali sa pagtabang sa biktima ug gidala nila sa Barili District Hospital apan wala makaantos gumikan sa grabing kadaut nga naÂangkon niini.
Sumala ni Pardo, posibling nga sa pagkabitik sa liog sa biktima, nabalitok kini ug naugbok ang ulo sa karsada.
Ang drayber nga si Ballena, nitahan sa kapulisan ug gitanggong sa pagkakaron sa prisuhan.
Gipaabot sa kapulisan ang kabanay sa biktima kon mopasaka ba sila og kaso karong adlawa batok sa drayber.
Linkback:
https://tubagbohol.mikeligalig.com/index.php?topic=78218.0
