GITABANGAN og kulata ang usa ka babaye nga naningil sa usa sa mga suspek niadtong milabay nga adlaw sa Camaman-an, dakbayan sa Cagayan de Oro.
Bun-og si Julie (dili tinuod nga ngalan), 27, adunay kaipon ug lumulupyo sa Creekside, Camaman-an ning dakbayan, human gikulataha nila ni Myta, Alden, ug Joan kinsa pulos ra usab residente sa nahisgutang dapit.
Gikabutyag sa report sa Police Station 2 nga nidangop ang biktima sa ilang buhatan human kini gitabangan og kulata.
Gidugang pa niini nga nagsumikad ang maong kagubot sa dihang gipaningil sa biktima si Myta sa iyang utang.
Posibleng gikasuko niini hinungdan nga misangpot sa kagubot ug nakulatahan ang biktima human usab gitabangan sa laing mga kauban niini.
Giingong gituok, gibira-bira ang buhok niini ug gisumbag pa ang iyang dagway ug ulo hinungdan sa bun-og niini nga naangkon.
Sa pagkakaron, giduso na sa Barangay Lupon sa nahisgutang barangay ang insidente aron nga mahusay ang maong kagubot. (KCS)
Gipatik sa mantalaang Superbalita Cagayan de Oro Septembre 20, 2016.
Linkback:
https://tubagbohol.mikeligalig.com/index.php?topic=82786.0