Ni Danny B. Dangcalan/EIM (Banat) Updated August 28, 2011 12:00 AM
BACOLOD CITY, Philippines — Usa ka kanhi pari nga nahimong doktor ug iyang kapikas ang gidakop sa mga sakop sa Criminal Investigation and Detection Group (CIDG) sa managlahing operasyon sa Negros Occidental niadtong nakalabay’ng Martes tungod sa kasong large-scale illegal recruitment ug estafa.
Ang gidakop mao sila si Dr. Nilo Justalero, 50, nga taga Iloilo City ug ang iyang asawang si Liza, 33, nga taga San Carlos City, Negros Occidental pinasikad sa arrest warrant nga giluwatan ni Regional Trial Court Branch 91 Judge Lita Tolentino Genilo sa National Capital Judicial Region sa Quezon City, sumala pa ni CIDG-Negros Occidental head, Chief Inspector Ray Cuanico.
Si Justalero, kinsa kanhi pari ug nadestino sa Bacolod Diocese kaniadto, gidakop diha sa Calatrava Municipal Health Office sa Calatrava, Negros Occidental diin siya magtrabaho samtang gidakop ang iyang asawa sa ilang balay sa Newtown Subdivision barangay 1 sa San Carlos City.
Ang duha wala tuguting makabutang og piyansa. Sumala pa sa rekord sa CIDG ang duha mi-recruit og mga residente sa General Trias Cavite ug gipasaligang patrabahuon didto sa London isip mga caregivers.
Sumala pa nga ang managtiayon nangayo og P25,000 isip placement fees sa matag recruits kinsa sagad gikan sa pamilyang kabus ug nangutang pa aron adunay ikabayad sumala pa sa CIDG report.
Samtang si Msgr. Victorino Rivas, Vicar General sa Bacolod Diocese, mibutyag nga ilahang gitambagan kaniadto si Justalero nga mopahuway ug sulbaron ang mga personal niining problema apan wala na kini mobalik pa sa ilang poder. (BANATNEWS)
Linkback:
https://tubagbohol.mikeligalig.com/index.php?topic=43187.0
