Friday, August 26, 2011
GIPALAYAS sa tambalan ang dautang espiritu nga misulod sa lawas sa mga estudyante sa Compostela National High School niadtong Huwebes didto sa lungsod sa Compostela, Comval Province.
Ang pagpalayas sa mga espiritu gihimo sa tambalan gikan sa lungsod sa Nabunturan human giatake sa dautang espiritu ang 56 ka sa mga estudyante nga mitambong sa flag raising ceremony sa maong eskwelahan.
Mga estudyante giingon nga nausab ang kinaiya, nagsalimuang ug nagyaw-yaw atubangan sa ubang estudyante, mga magtutudlo, ug opisyal sa lungsod nga gipangulohan ni Mayor Jessie Bolo.
"Base sa record ni Mrs. Hilda Gales, miabot og 56 ka mga estudyante ang na-possess sa dautang espiritu," pahayag ni Emm Garcia-Obenieta, Information and Tourism Officer sa lungsod sa Compostela dihang gihinabi sa telepono kagahpon sa Super Balita.
Si Obenieta nagbutyag nga human nasayud ang ilang mayor, miadato dayon si Bolo uban ang mga sakop sa Compostela Emergency and Response Team.
Mga estudyante, suma ni Obenieta, giatiman dayon sa mga rescuers ug gipangdala sa luwas nga lugar sama sa Sr. Santiago Parish.
Miabot sab sa maong lugar ang Holy Infant Community sa Compostela aron atimanon ang mga biktima.
Tungod sa nahitabo sa mga estudyante, nakahukom ang school principal nga di una magklase kagahapong adlawa aron mahimo sa mga 'exorcists' ang pagpalayas sa dautang espiritu.
"Karong adlawa naka-decide si Mrs. Anselma Campus nga dili lang una mag-klase para di mosamot ang trauma sa mga estudyante nga nakakita sa nahitabo kagahapon," pahiabalo ni Obenieta kagahapon.
Si Obenieta nagbutyag nga mobalik ang klase sa maong eskwelahan karon Agosto 31.
Sanglit way klase kagahapon, gihimo sa kaparian ang usa ka misa sa maong eskwelahan aron ampoan ang mga dautang espiritu nga nagpuyo palibot sa eskwelahan.
Mga ginikanan, suma sa opisyal, nanghinaut nga di na mobalik ang dautang espiritu aron di madisturbo ang pagtuon sa ilang mga anak. (Alger P. Dura)
Gipatik sa mantalaang SuperBalita Davao Agosto 27, 2011. Linkback:
https://tubagbohol.mikeligalig.com/index.php?topic=43170.0
