Ni JEEPY P. COMPIO
GIPATAY ang usa ka asawa nga maestra sa iyang kaugalingong bana human nasayran nga adunay giingong tago nga relasyon sa school director sa pribadong tunghaan nga iyang gitudloan.
Ang pagpatay nahitabo alas kwatro sa hapon niadtong Dominggo, Agosto 21, didto sa ilang balay sa Gentiles Compound, Barangay Toril Poblacion, dakbayan sa Davao.
Nailhan ang biktima nga si Jacky Lou (bansagon gitago tungod sa hangyo sa kabanay), magtutudlo sa usa ka tunghaan sa Barangay Baliok, Talomo District ning siyudad.
Si Jacky Lou adunay upat ka gagmay nga mga anak.
Sa inisyal nga imbestigasyon ni Senior Police Officer 2 Leo Romero, Arson and Homicide Section investigator sa Toril Police Station, nasayran nga misulong ang suspek nga si Armando, sa tunghaan nga gitudloan sa iyang asawa nga natunong nga dunay nagpadayon nga programa nga Family Day ang tunghaan.
Subay sa report sa kapulisan, kalit gikompronta sa suspek ang school director sa tunghaan gumikan sa pagtuong dunay tago nga relasyon sa iyang asawa.
Ang school director gitawag nga pari sa iyang kongregasyon.
Tungod sa maong hitabo, nakurat ang mga ginikanan nga mitambong sa Family Day.
Una niini, nadunggan sa mga silingan nga nangayo pa og panabang ang biktima human sa panaglalis ug taud-taod napalgan nalang sa mga silingan nga patay na ang biktima.
Nakuha sa nahitaboan ang kutsilyo nga nabulit og dugo nga maoy gigamit sa pagdunggab sa makadaghang higayon.
Hinuon daling nasikop ang suspek sa kapulisan ug Task Force Davao human misulong sa tunghaan ang suspek.
Ang suspek gibalhog karon sa selda sa kapulisan samtang ang biktima gihaya sa Angel Funeral Parlor sa Toril.
Gipatik sa mantalaang Superbalita Davao Agosto 23, 2016.
Linkback:
https://tubagbohol.mikeligalig.com/index.php?topic=82688.0