Ni Dennes R. Tabar
Thursday, March 3, 2011
MIREKLAMO ang usa ka tiguwang lalake sa lungsod sa Bantayan kay dugo na ang nigawas sa iyang kinatawo nga gi-catheter kay naglisod siya sa pagpangihi sud na sa tulo ka mga adlaw.
Mao diay nga dugo ang nigawas kay sayop ang pagkataod sa catheter tungod kay ang nihimo niini janitor, inay doctor sa Bantayan District Hospital.
Gumikan niini, ang mayor sa Bantayan nimando og imbestigasyon labot sa insedenti niadtong Marso 1 sanglit tawo man sa mayor ang pasyente.
Ang mireklamo mao si Astero Rivera, 68, taga Barangay Ticad, lungsod sa Bantayan, Isla sa Bantayan, empleyado sa pamilya ni Mayor Ian Chris Escario.
Niadtong Martes, si Rivera niadto sa Bantayan District Hospital tungod kay tulo na ka adlaw nga wa siya makaihi.
Hinungdan nga gipatauran siya og catheter nga maoy maagian sa iyang hugaw.
Apan, giingong ang nitaod sa catheter mao si Arturo Abello, janitor sa maong tambalanan.
Si Dr. James Najaro, usa sa mga staff sa tambalanan, nikompirmar nga ang ni-catheter kang Rivera mao gayod si Abello.
Apan siya nipasabot nga daghan og mga pasyente niadtong higayuna.
Gawas pa, ila kining gibansay sa paghimo niini.
“O pero amo sab na silang gi-training diri. Kaniadto ang guwardya, pero karon kanang utility ba, amo sab nga gitudlo-tudloan,â€pasabot ni Najaro nga nahinabi sa Sun.Star Superbalita.
Iyang gibutyag nga si Abello security guard kaniadto apan human nga aduna nay mga guwardya gikan sa Kapitolyo, ila kining gihimong utility.
Matod niya nga siya mismo nisuway sa pag-catheter kang Rivera apan iyang giangkon nga naglisod usab siya.
Hinungdan nga iya kining girekomedar nga magpadala na lang sa Vicente Sotto Memorial Medical Center (VSMMC) diri sa dakbayan sa Sugbo.
Nasayran nga out- patient lang si Rivera sa VSMMC ug gihatagan og tambal aron maka-ihi.
Gibutyag sa mga mananambal sa VSMMC nga ang hinungdan sa pagdugo tungod kay sayop ang pag-catheter niini.
Si Dr. Najaro nga nahinabi sa Sun.Star Superbalita niingon nga nihimo na sila og mga kausaban sa tambalanan aron di na masubli ang hitabo.
Giangkon ni Najaro nga nakadawat silag kamandoan ni Escario nga mopahigayon og pakisusi labot sa insedenti tungod kay wa mahimuot ang mayor sa hitabo.
Nasayran, ang head sa Bantayan District Hospital nga si Dr. Tomasita Santillan nag-leave atol sa hitabo ug karon pang adlawa mobalik sa pagtrabaho.
Gipatik sa mantalaang SuperBalita Cebu Marso 04, 2011. Linkback:
https://tubagbohol.mikeligalig.com/index.php?topic=38521.0
