Ni Guam P. Logroño
Saturday, February 26, 2011
GIINGONG bodyguard sa bise-mayor sa dakbayan sa Carcar giakusahang namuso, gidakop dihang gireklamo nga nanghulga ug nagpakita sa iyang armas human gibadlong sa ilang silingan nga undangon na niini ang iyang malaw-ay nga binuhatan matag kaadlawon.
Apan ang suspek nanghimakak nga bodyguard siya sa opisyal.
Nagtingkagol sa karsel sa Carcar Police Station si Hermogines Plarisan, 50, bodyguard ni Bise Patrick Barcenas sa Carcar, taga Sitio Awayan, Barangay Poblacion 3, human nakuhaag usa ka kalibre .45 nga pistola uban sa walo ka mga bala sa magazine.
Si PO1 Julis Aniñon, sa Carcar Police Station nga nahinabi sa Sun.Star Superbalita, nagkanayon nga ilang gisignit si Plarisan, human ang managtiayong Welbren ug Zenaida Sato, nga iyang silingan ug paryente, nireklamo sa miaging buntag didto sa police station.
Matod pa niini nga ang managtiayong biktima ug suspek nagkakomprontasi sa miaging buntag tungod kay gisumbong sa asawa ngadto sa iyang bana nga nagsigig panglili kaniya matag kadlawon sa panahon nga siya maligo.
Tungod sa mainiton nilang panaglalis, ang suspek gikatahong nipakita sa iyang armas nga giloklok diha sa iyang lawas ug giingong giaksyunan pa sa pagbunot niini hinungdan sa kahadlok sa mga biktima nga nisumbong sa police station.
Si Aniñon niingon nga dihang ilang nadawat ang report, siya ug ang iyang kauban uban sa mga biktima sakay sa pribadong sakyanan, niadto sa balay sa suspek.
Dihang ilang naabtan, nasurprisa kini kay nasakpan sa akto nga naghupot sa armas.
Way gipakitang dukomento sa armas ang suspek hinungdan nga ilang gibalhog sa karsel ug gipasakaag kasong illegal possession of firearm niadtong Biyernes.
Apan si Plarisan niduso og waiver hinungdan nga nagpabilin sa police station.
Si Plarisan nga nahinabi sa Sun.Star Superbalita kusganong nanghimakak sa tanang mga pasangil batok kaniya nga iyang gihulagway nga di tinuod ug tumo-tumo lang.
Lakip sa iyang gipanghimakak nga siya bodyguard ni Barcenas sanglit usa lang siya ka job-order employee sa lungsod niadtong mayor pa kini.
Human mapupos ang iyang kontrata, nag-standby na lang siya ug wa nay trabaho.
Gipasabot niya nga nagkaaway sila ni Welbren ug Zainada nga asawa niini human iyang gisukmatan nga mohunong sa ilang pagtumo-tumo og estorya ngadto sa iyang asawa nga makadaot kaniya.
Sumala pa niya nga iyang gisukmatan ang manatiayon nga di magpatakag sulti nga bati batok kaniya ngadto sa iyang asawa sanglit nagkaaway sila niini.
“Ngano gud tawong manglili ko niya ha…kada kadlawon, sobra na sab na tumo-tumo nang ilaha duna koy asawa ug pamilya. Dili na mao. Nagpataka na man lang na sila,†dugang ni Plarisan.
Samtang ang problima niyang gi-atubang may kalambigitan sa iyang armas nga way lisensya, iya na lang kining ipatubag sa iyang abagado.
Ang Sun.Star Superbalita nisuway og tawag sa cell phone ni Barcenas, apan di kini makontak.
Gipatik sa mantalaang SuperBalita Cebu Pebrero 27, 2011.
Linkback:
https://tubagbohol.mikeligalig.com/index.php?topic=38347.0
