MikeLigalig.com

Gipatay. Gisusi sa mga Crime Scene Operative (Soco) ang dapit diin mahagba si Jaswinder Singh Gill human siya pusila makadaghan sa duha ka mga tawo nga nagmotorsiklo usab niadtong Lunes sa gabii sa sityo Abuno, Brgy. Pajac, dakbayan sa Lapu-Lapu. (tampo nga hulagway)

Usa ka Indian national nga giingong tigpatanto gi-ambush sa duha ka mga tawo nga nagmotorsiklo samtang nagsakay sa iyang motorsiklo padung mopauli sa iyang balay sa Brgy. Abuno, Pajac, Lapu-Lapu City pasado alas 8:40 sa gabii.

Si Jaswinder Singh Gill, 42, gipusil sa makadaghang mga higayon sa duha ka wala mailhi nga mga tawo suspek nga nagsakay usab og motorsiklo.

Nakaangkon si Gill og samad pinusilan sa wala ug tu-o nga bahin sa iyang ulo, buku-buko ug sa wala nga bukton nga maoy hinungdan sa iyang hinanaling kamatayon.

Narekober gikan sa crime scene ang tulo ka mga magazine sa .45 kalibre nga pistola ug duha ka mga bala.

Nakuha usab sa kapulisan gikan sa bulsa sa biktima ang kwarta nga di muminos sa P170,000 nga iyang nakolekta gikan sa iyang negusyo nga lending.

Wa pa matino sa kapulisan kon unsa ang motibo sa pagpatay sa biktima.

Di usab sila makasulti nga tulis tungod kay wa kuhaa ang kuwarta gikan sa iyang bulsa. -- http://www.sunstar.com.ph/superbalita-cebu/balita/2015/04/14/