Ni JEEPY P. COMPIO
WA NAY kinabuhi nga napalgan ang caretaker sa usa ka farm human gituohang nahulog ug naguyod sa iyang gisakyan nga kabayo niadtong Lunes.
Alas 7:00 sa buntag niadtong Lunes napalgan ang patay nga lawas sa biktima nga naila lamang nga si Bernard, nagpangedaron og 20-25 anyos, didto sa Sitio Northern, Barangay Binugao, Toril District, dakbyan sa Davao.
Sa inisyal nga imbestigasyon ni Senior Police Officer 2 (SPO2) Leo Romero, imbestigador sa Homicide and Arson Section sa Toril Police Station, nasayran nga ulahing nakita ang biktima alas 3:00 sa kaadlawon nga lango sa ilimnong makahubog nga misakay sa kabayo.
Ang kabayo nga giatiman sa biktima gipanag-iyahan ni Reynaldo Guerra, tag-iya sa gibantayan nga farm sa biktima sa maong dapit.
Usa ka Anastacio Bucad, residente sa dapit, ang nakakita sa patay nga lawas sa biktima kinsa nagbuy-od nga wala nay kinabuhi samtang anaa sa kilid ang kabayo duol sa iyang panimalay.
Sa pagsubay sa kapulisan dunay daghang bun-og sa kalawasan ang biktima nga gituohan gipatid-patiran sa kabayo nga maoy hinungdan sa iyang kamatayon.
Dugang nasayran nga samtang sakay ang biktima sa kabayo, nahiplos ang iyang gigunitan nga pisi maong naguyod siya pipila ka metros.
Giingon nga tungod sa iyang kalagot, gipahimungtan niya ang kabayo hinungdan nga gipatid-patiran siya hangtud namatay.
Ang patay nga lawas sa biktima anaa sa morgue sa Villa Funeral Homes sa Toril ning dakbayan.
Gipatik sa mantalaang Superbalita Davao Abril 06, 2016.
Linkback:
https://tubagbohol.mikeligalig.com/index.php?topic=82171.0