Ni PHILIP A. CEROJANO
NANAWAGAN ang Movement for Livable Cebu (MLC), sama sa panawagan sa ubang mga grupo, kang Mayor Michael Rama sa di pagkuha sa mga kahoy sa Pope John Paul II Avenue sa pagpalapad sa karsada isip preparasyon sa International Eucharistic Congress karong Enero 26-31.
Ang kadagkuan sa MLC pinangulohan ni Marc Canton, nakigtagbo ni Rama sa miaging gabii.
Ilang gipakita ang ilang pamaagi unsaon pagsulbad ang kahuot sa trapiko sa lugar nga di mahilabtan ang dagko nga kahoy.
Matod pa ni Canton sa interview sa Sun.Star Cebu nga mas maayo nga ang center island maoy kuhaon gikan sa Cardinal Rosales Avenue (intersection sa Ayala) paingon sa Governor Cuenco (ilawom sa flyover) diin maghuot ang mga sakyanan.
Si Rama gusto nga matangtang ang center island ug ibalhin ang mga kahoy pinaagi sa pag- earthball kun paglalin ngadto sa laing lugar.
Gusto ni Rama nga mapaluagan ang dagan sa trapiko sa lugar sanglit gibanabanang di momenos 50,000 ka mga tawo ang moagi sa lugar panahon sa IEC ug pagpangandam usab sa Asia Pacific Economic Cooperation nga ipahigayon sunod buwan.
Giklaro sa mayor nga di ang tibuok Pope John Paul avenue ang tangtangan og center island ug balhinon ang kahoy kon di ang eskina Ayala Access Road paingon sa flyover ang iyang gipasabot.
Gipatik sa mantalaang SuperBalita Cebu Hulyo 16, 2015.
Linkback:
https://tubagbohol.mikeligalig.com/index.php?topic=80526.0
