Ni Jojo C. Ugdol (Banat) | Updated July 15, 2015 - 12:00am
CEBU, Philippines – Wala na nakamata ang lalaki nga libud-suroy human nakaangkon og dili mominus lima ka samad dinunggaban samtang natulog sa kilid sa Mahiga Bridge sa Banilad, dakbayan sa Sugbo pasado alas 3 sa niagi’ng kadlawon.
Ang biktima giila lang sa pangan nga Jessie alyas Insik, hingkod nga lumad nga taga Maguikay, dakbayan sa Mandaue.
Sumala pa ni Police Officer 1 Reufol Adalim sa homicide section sa Cebu City Police Office nga nahinabi sa Banat News nga posible’ng may nakaaway ang biktima ug igo lang kini gibawsan.
Samtang nahinanok sa pagkatulog ang biktima kauban ang iya’ng mga higala, kalit lang niabot ang mamumuno dayun hansak sa hait nga hinagiban sa nagkadaiya’ng parti sa lawas sa biktima sama sa dughan, tiyan ug uban pa.
Ang mga kauban nga nakabantay ang dali pa unta nga nitabang sa biktima apan paspas sab kaayo nga nisutoy og dagan ang mamumuno kinsa gisuwayan pa og gukod apan wala na naapsi.
Suway pa unta nga gitabang ang biktima apan nakabsan gyud sa iya’ng kinabuhi. – /GMR) (BANAT NEWS)
Linkback:
https://tubagbohol.mikeligalig.com/index.php?topic=80518.0
