Ni JEEPY P. COMPIO
NAG-ABOT sa San Pedro Police Station ang usa ka dalaga ug duha ka ulitawo aron hukman atubangan sa mga pulis kung kinsa sa duha ang pakaslan sa dalaga.
Alas 9:45 kagahapon sa buntag nahukman nga mopili og pakaslan si Marineth (bansagon gipatago sa nagsuwat), 23, lumad nga taga Jose Abad Santos, Davao Occidental gumikan sa nahitabo nga pagpakaulaw kaniya sa iyang boyfriend.
Una niini, usa ka oras una sila gipangdala sa presinto dos, mipatim-aw si alyas Jerry, 21, tattoo artist, taga Barangay 7-A Poblacion dayon gipakaulawan si Marineth.
Niadtong orasa, si Marineth nakig-istorya kang alyas Richard, 23, ulitawo, roomboy sa lodge, taga Barangay Talucanga, Malita, Davao Occidental didto sa usa ka bakery nga iyang gitrabahoan.
Kalit miabot si Jerry dayon gisumbag si Richard, apan gilabanan kini ni Marineth tungod naa silay gitago nga relasyon.
"Gidala-dala lang nako akong mga kasakit kang Jerry. Guwapo siya pero pangit og kasingkasing," sulti ni Marineth nga nahinabi sa Sun.Star Davao SuperBalita gawas sa presinto.
"Kana iyang giilis sa akoa, pangit kaayo, pangag pa gyud," sulti ni Jerry nga hilabihang pagtamay samtang nakig-istorya sa cellphone si Richard sa iyang mga ginikanan.
Mga ginikanan ni Richard nagpasalig nga ilang ihawon ang usa ka baka ug lima ka mga kanding sa seremonya sa ilang pagdawat sa babaye.
Sa maong hitabo, nahisgutan sa mga naglinya nga nagpa-blotter ang lyrics sa kantang 'Humanap ka ng pangit at ibigin mong tunay' nga gipasikat ni Andrew E.
Gipatik sa mantalaang SuperBalita Davao Oktubre 08, 2015.
Linkback:
https://tubagbohol.mikeligalig.com/index.php?topic=81124.0
