MikeLigalig.com

Ni Lesley Caminade-Vestil (Banat) Updated May 23, 2011 12:00 AM


CEBU, Philippines - Maayong pagkatagak sa usa ka construction worker ngadto sa usa ka bung-aw pasado alas-2 sa kaadlawon kagahapon sa sitio Kalubihan barangay Banilad ning dakbayan apan gituohang dili aksidente ang nahitabo kundili gituyo kini paghagbong.

Ang biktima nailhan nga si Ramon Eloy, 33, samtang ang gikonsiderar nga suspetsado mao usab ang iyang kauban nga si Tony Aquillano Jr., 32.

Sa imbestigasyon sa kapolisan nasayran nga ang biktima ug ang suspetsado nagkalingaw og inom uban sa mga kahigalaan duol sa panimalay sa usa ka Laureto Villaver sa wala pa mahitabo ang pagkahagbong ni Eloy.

Pipila ka oras ang milabay, tungod sa ilang kahubog ang duha nagsinukmatay ug miresulta kini sa ilang sinumbagay ug wala lang damha nga mao usab kini ang hinungdan nga ang biktima natagak sa 12- metros nga bung-aw.

Gikatahong nag-una ang ulo sa biktima sa ubos ug maayong pagkabugsok niini sa aspaltadong dalan nga maoy hinungdan sa iyang hinanaling kamatayon.

Ang mga mirespondeng barangay tanod dali usab nga misikop sa suspetsado ug kini mi-esplikar nga ang biktima maoy mibalik ug mihagit kaniya og inom apan gibalibaran niya kini.

Apan giingong nasuko si Eloy ug gisuwayan siya og layog niini aron itukmod sa bung-aw hinungdan nga misukol siya ug nakiglayog apan sila na hinuong duha ang nangahagbong sa bung-aw.

Nangangkon kining naswertihan lang siya kay nasangit siya sa kilid sa bung-aw apan gidemalas si Eloy ug nalahos ngadto sa ubos.

Ang suspetsado kasamtangang gitanggong sa Mabolo Police Station samtang mihimo pa og lawom nga imbestigasyon ang kapolisan.

Matud pa ni PO3 Ruth Violango, sa Homicide Section nga sa ilang nakuha nga impormasyon sa wala pa matagak ang duruha gikatahong pareho na sila hubog ug sunod nga nadunggan nga naghinagitay og sukmagay ang duha. (BANAT NEWS)

Quote from: hubag bohol on May 23, 2011, 05:53:54 PM
Gikatahong nag-una ang ulo sa biktima sa ubos ug maayong pagkabugsok niini sa aspaltadong dalan nga maoy hinungdan sa iyang hinanaling kamatayon.

Aspaltado unya 12 metros, tsk, tsk, tsk...

sige, inom pa mo.

mag-inom para mayabag ang utok, nah bugsok hinoon

Ang bino wala isulod sa tiyan, tua paingon sa utok--unya mikatay paingon sa kinumo...

Quote from: hubag bohol on May 24, 2011, 10:07:47 AM
Ang bino wala isulod sa tiyan, tua paingon sa utok--unya mikatay paingon sa kinumo...

Bwahahaha. Sa ahong pangagpas ani Bay Hubs, gihimo rang command center sa bino ang utok. Mao nang nakasugo ang bino intawon sa ultimong mga nerves nga ipaactivate ang kinumo mode.

Quote from: taga tigbao on May 24, 2011, 01:17:34 PM
Bwahahaha. Sa ahong pangagpas ani Bay Hubs, gihimo rang command center sa bino ang utok. Mao nang nakasugo ang bino intawon sa ultimong mga nerves nga ipaactivate ang kinumo mode.

Unja basin nasugnoran pud sa kasilo o kahiubos ba kaha nga napukaw sa gahom sa alak, mao nga instant ang activation sa Operation Tukmod...