MikeLigalig.com

Ni Rey Pasaporte (Banat) Updated March 29, 2011 12:00 AM


CEBU, Philippines - Patay diha dayon ang usa ka lalaki human gipusil sa duha ka wala mailhing mamumuno kagahapon sa alas-10 pasado sa buntag diha sa sitio Nava sa Alaska sa barangay Mambaling ning siyudad sa Sugbu.

Si Arnaldo Cason, 33, kanhi kargador og bugas diha sa pantalan nahiagom og duha ka samad pinusilan sa tuong apapangig ug bukobuko gamit ang .45 nga kalibre nga armas.

Ang mga sakop sa Homicide Section ug Crime Scene Investigation Unit (CSIU) sa Cebu City Police Office (CCPO) nakakuha og usa ka kabhang sa .45 nga kalibre ug snubnose revolver nga dunay mga buhing bala nga gituohan sa kapulisan nga iya sa biktima.

Si PO3 Ruth Violango, imbestigador sa Homicide Section nga nahinabi sa mga tigbalita nagkanayon nga sa wala pa mahitabo ang pagpamusil, ang biktima gigukod sa duha ka armadong tawo.

Matud ni Violango nga unang naigo sa bukobuko ang biktima mga 50 metros ang distansya gikan sa dapit diin kini unang gigukod ug sa iyang pagkahagba gitiwasan kini sa tuong bahin sa iyang nawong.

Dili pa makasulti ang kapulisan kun unsay motibo sa pagpamusil apan nakakuha sila og impormasyon nga taga diha ra sa Alaska ang duha ka mamumuno apan walay mibarog nga testigo sa krimin tungod ba kaha sa kahadlok.

Matud ni Violango nga dunay higala ang biktima nga miduol kanila ug mipasalig nga motawag sa ilang buhatan aron mohatag og dugang impormasyon nga makahatag sa motibo ug pag-ila sa mga kriminal.

Susihon usab sa kapulisan ang background sa biktima sanglit dunay impormasyon nga nabilanggo na kaniadto ang biktima. (EIM) (BANATNEWS)

Tsk, tsk, tsk, daghan jud bitawng badlongon dihas Alaska...

kayano na baya nga mopatay ug tawo morag hayop...

Kasagaran ani nila guns for hire, wa nay balatian...