Ni STEPHANIE V. BERGANIO
GIBINAKLID ug gitagak pa sa bangag ang usa ka wala mailang lalaki nga napalgang walay kinabuhi kagahapon sa buntag sa Barangay Molugan, dakbayan sa El Salvador, Misamis Oriental.
Ang biktima wala pay identipikasyon sa pagsulat ning balita apan gibana-banang nagpangidaron og 20 ngadto 30 pataas, nagsul-ob og shortpants ug t-shirt ug adunay sweatshirt. Pution usab ang biktima ug insakto lang ang panglawas.
Gibutyag ni Dr. West Edquila gikan sa Scene of Crimes Operative (Soco) kinsa maoy nangulo sa pagsusi sa patayng lawas nga nakuha kini sa gibana-banang adunay napulo ka tiil nga kalawomon nga bangag sa dapit.
Giingong ang bangag dalan sa tubig alang sa basakan.
Sa pagkakita sa biktima gibinaklid kini ug gihiktan og pisi ang kamot.
Aduna usab kini usa ka samad pinusilan sa iyang ulo nga bahin. Aduna usab nakuha nga basyo sa bala sa wala pa matinong armas.
Gitouhang wala pa nagbaynte kwatro oras gikan gipusil ang biktima dihang napalgan kini.
Ang biktima ning panahona anaa na gidala sa Bollozos funeral parlor alang sa bout mosusi ug motan-aw sa hitsura niini labina niadtong mga nawad-an og kabanay.
Gipatik sa mantalaang Superbalita Cagayan de Oro Abril 05, 2016.
Linkback:
https://tubagbohol.mikeligalig.com/index.php?topic=82154.0
