Ni Christell Fatima Tudtud (Banat) | Updated April 4, 2016 - 12:00am
CEBU, Philippines - Patay’ng lawas sa 21-anyos nga babaye nakit-an sulod sa karton nga gibiyaan sa usa ka balay diha sa BM Dimataga Street, Brgy. Poblacion, Dakbayan sa Lapu-Lapu sa alas 2:15 sa hapon sa miaging Sabado.
Matud ni Police Officer 3 Luisito Ernie, imbestigador sa Lapu-Lapu City Police Office-Homicide Section nga ang patay’ng lawas mao si Merymie Caburnay residente sa Sitio Oppra, Brgy. Kalunasan, Cebu City.
Sa pakisusi ni Ernie, patay na daan si Caburnay ug nagluko ang posisyon niini sud sa karton ug gibiyaan diha sa panimalay ni Arnel Degamo. Sumala pa ni Ernie, base sa nakuha nilang impormasyon duha ka lalaki ang nagdala niini diha sa balay ni Degamo nianang pagka-kaadlawon, apan kay wa man diha ang gipangita gibilin lang kini diha sa gawas sa balay.
Sa dihang naabot si Degamo sa balay sa alas 11 sa buntag, nibalik ang duha ka lalaki ug mitugon kaniya nga ipalubong ang naa sa sulod sa karton nga matud pa “fetus ra.â€
Matud pang Ernie, wa motuo si Degamo kay dako ra ang karton aron sudlan og fetus maong gilili kini ug nakurat kini kay hamtong nga babaye nga nagluko ug giputos og banig ug habol ang sud sa karton.
Si Degamo misaysay sa mga polis nga giingnan siya sa usa sa duha ka suspetsado nga pakuyogon siya kanila padulong sa usa ka hotel sa Sugbo ug tungod sa kahadlok nikuyog siya sa duha kay armado man ang usa.
Nakaikyas lang gikan sa duha si Degamo human namasangil nga mopalit og sigarilyo ug mipauli siya sa ilahang balay sa kahadlok.
Samtang wala sa balay si Degamo, nakabantay ang ig-agaw niini nga ginganlan lang og Benjie nga adunay baho kaayo nga nangalisbo gikan sa taas sa ilahang balay nianang pagka-hapon.
Wala nakaagwanta sa baho si Benjie ug iyaha kining gisaka sa ikaduhang andana sa balay ug nakurat nga miagas ang dugo gikan sa karton ug nakurat nga patay’ng lawas kini sa babaye. Daling nangayo og tabang si Benjie sa kapolisan.
Gituohan nga adunay miaswat sa karton gikan sa ubos ug gidala kini ngadto sa taas aron dili makita sa mga tawo.
Ang patay’ng lawas ni Caburnay anaa sa Surelife Funeral Homes alang sa pag-autopsy niini. Si Ernie mitataw nga adunay foul play sa insidente human migawas sa awtopsiya nga dunay nakitang samad sa ulo ni Caburnay.
Matud ni Ernie, usa sa duha ka suspek nailhan na ug residente kini sa Oppra sa siyudad sa Sugbu apan gipugngan pa ang pangalan niini samtang naghimo og dugang imbestigasyon sa pangangkon ni Degamo. - /EIM (BANAT NEWS)
Linkback:
https://tubagbohol.mikeligalig.com/index.php?topic=82141.0
