MikeLigalig.com

Ni JEEPY P. COMPIO


MAAYONG pagkatata sa ngabil ug pagkabun-og sa aping sa usa ka lalaki human gibukbok sa igsuong lalaki sa iyang girlfriend nga kaslunon sa ubang lalaki.

Sa ngalan sa gugma, mas gipili ni Lloyd (bansagon gitago sa SuperBalita), 24, nagpuyo sa San Rafael Village, Barangay 10-A Poblacion, siyudad sa Davao, nga kulatahon siya di lang mapakyas ang ilang panagkita sa babaye nga dugay na niyang ka-textmate.

Gisaysay sa blotter nga natala ni SPO2 Harold P. Gamutan, duty desk officer sa San Pedro Police Station, nga daghan og samad nga mipatala sa presinto dos ang biktima.

Si Lloyd nagtug-an sa pulis nga alas 11:20 sa gabii niadtong Dominggo, samtang naa siya sa Duha Subdivision sa San Rafael Village, sila alyas Marlon ug alyas Aljun mitabang pagbukbok kaniya.

Ang pagpangulata maoy hinungdan sa pagkatata sa iyang ngabil ug pagkabun-og.

Nagsugod ang kagubot dihang giingnan siya sa maguwang sa iyang ka-textmate nga mopalayo na sa iyang igsuon nga babaye kay minyuonon kini sa laing lalaki.

Wa gihapon nagpatuo ang biktima gumikan dako iyang pagtuo nga siya ang higugmaon kay dugay na silang nag-uyab pinaagi sa text, apan wa pa sila magkita sa personal.

Dugang nasayran sa SuperBalita nga di gusto sa igsuon nga lalaki nga mag-uyab sila gumikan hitsuraan ug maayo ang kahimtang sa lalaki nga ilang ipaminyo sa igsuon.

Gipasabot sa nakulatahan nga di hitsura ang sukdanan sa tinuod nga panaghigugmaay.

Human sa pagpangulata, daling miabot ang disaster mobile sa Barangay 10-A maong nakadagan ang duha ka lalaki.

Gipahimangnoan ang biktima nga mopatambal sa ospital ug mokuha og medical certificate aron magamit sa pagpakasa og kaso.


Gipatik sa mantalaang SuperBalita Davao Septembre 29, 2015.

Linkback: https://tubagbohol.mikeligalig.com/index.php?topic=81069.0