DAVAO -- Usa ka 10-anyos nga batang lalaki ang gipatambalan sa iyang inahan sanglit gibugno siya ug aswang alas 9:00 sa gabii niadtong Oktubre 5.
Ang rekord sa Southern Philippines Medical Center (SPMC) nagbutyag nga nahitabo ang insidente pasado alas 9:00 sa gabii didto sa Barangay Indangan, Buhangin District, siyudad sa Davao.
Ang biktima mao si Kim Jay Camanso, grade five pupil, ug nagpuyo sa Barangay Indangan.
Si Kim Jay gipatambalan sa iyang inahan nga si Juliet Camanco tungod sa mga kinamrasan sa iyang kalawasan.
Ang biktima nagbutyag sa mga guwardiya nga nagdula siya kauban ang iyang mga higalang bata sa bukiron nga bahin sa ilang lugar.
Giasoy niya nga nagsaba-saba sila sa maong dapit mao nga kalit mipakita ang usa ka tiguwang lalaki nga taas ug puti na kaayo ang buhok.
Dugang saysay niya nga gikamras siya sa hait kaayong kuko sa tiguwang mao nga nasamad iyang dagway.
Nagduda sila nga aswang ang miatake sa biktima mao nga gibati na ug kahadlok ang mga molupyo sa maong lugar.
Si Haidee Mercado, silingan sa biktima, nagsulti sa SuperBalita nga gibati na sad og kahadlok ang mga bata sa ilang lugar.
"Gibira paingon sa ngitngit ang biktima sa tiguwang nga balhibuon kaayo ug tag-as og kuko. Nakita sa iyang kauban nga babaye ang nahitabo mao nga iyang gibira sab ang biktima," sulti ni Mercado.
Nasayran gikan niya nga naglakaw ang biktima uban sa pito ka mga bata sa lugar, apan pag-abot nila sa giabandonang balay, kalit silang giatangan sa aswang.
Saysay pa niya nga unang gidala ang biktima sa Albularyo sa ilang lugar, apan tugod kay grabe ang mga samad, gidala na sa ospital. (Sun.Star SuperBalita Davao)
Linkback:
https://tubagbohol.mikeligalig.com/index.php?topic=55611.0
