MAOY namat-an sa usa ka 16 anyos nga dalagita nga wala na siyay sapot ug sakit ang iyang pribadong parte sa lawas niadtong nilabayng adlaw diha sa Luyong Bonbon, lungsod sa Opol, Misamis Oriental.
Tungod niini, dako ang pagtuo ni Lyn (tinuod nga ngalan gipugngan) nga gilugos siya sa iyang mga kauban sa inom niadtong tungora.
Si Police Senior Inspector Rogelio Labor, hepe sa Opol Police Station nisaysay basi sa pamahayag sa biktima nga unang nag-inom ang grupo sa videokihan sa usa ka beach sa maong dapit.
Kauban ni Lyn ang upat ka mga lalaki ug laing usa ka babaye nga uyab sa usa sa suspek. Adunay nakasulti nga gibutangan og vetsin ang ilimnon sa biktima hinungdan nga grabe ang kahubog niini ug mga alas 11:00 sa gabii nakasulti pa nga mouli na. Usa sa upat ka mga lalaki ang niuli na usab niadtong tungora hinungdan nga tulo na lamang ka mga lalaki ang nahibilin.
Apan ang mga lalaki gusto pa nga moadto sa balay sa ilang higala nga nahimutang sa Luyong Bonbon. Tungod lagi kay walay kauban mouli og una niuban si Lyn sa Luyong Bonbon ug didto nakatulog.
Maoy namat-an sa biktima nga wala na iyang sapot ug gibati na og kahapdos sa iyang pribadong parte sa lawas. Iyang nakita sa iyang atubangan ang duha ka mga lalaki nga nag-edad og 15 anyos ug 20 anyos nga nagkatawa.
Tungod niini nibalikwas og bangon ang biktima ug deretsong gisul-ob ang iyang mga sapot ug midagan paingon sa gawas mga ala 1:00 sa kadlawon.
Dihang nakita sa nag-roving nga polis nangayo kini og tabang ug deretso usab dayon nga gisikop ang duha ka mga lalaki kinsa mihimakak sa mga alegasyon. Rason sa duha ka mga lalaki nga gihinol usab niini ang ilang pribadong parte.
Matud ni Labor nga naglibog sila niining panahona kung kinsay nagsulti sa tinuod tungod kay lain lain ang bersyon sa biktima ug mga suspek.
Matud ni Labor nga apil sa makasahon ang tag-iya sa balay nga higala, babaye nga kauban ug uyab niini tungod sa pag-tolerate sa nahitabo sa biktima.
Gihulat na lang usab ang resulta sa medical examination sa biktima ug ipasaka na ang kaso batok sa mga suspek.
Dugang ni Labor nga unta mahimo kining leksyon sa mga babaye o mga batan-on nga hilig makig-inom kauban ang mga lalaki.
Gipatik sa mantalaang SuperBalita Cagayan de Oro Oktubre 09, 2012.
Linkback:
https://tubagbohol.mikeligalig.com/index.php?topic=55609.0
