Ni Bryner L. Diaz, EIM (Banat) | Updated May 10, 2015 - 12:00am
CEBU, Philippines - Gipusil patay ang usa ka dispatser sa tulo ka lalaki samtang nagbarog kini sa may Sudlon, Barangay Lahug sa dakbayan sa Sugbo sa miaging hapon.
Ang biktima naila nga si Weces Colis, 31, taga Upper La Guerta sa Lahug ug giingon nga usa ka dispatser sa jeep.
Si Police Officer 1 John Erick Samosa, sa Homicide Section sa Cebu City Police Office nga nahinabi sa Banat News miingon tulo ka wa mailhing lalaki ang miabot ug ang usa kanila maoy mipusil sa biktima.
Naigo ang biktima sa tuong tampihak nga maoy hinungdan sa iyang kamatayon.
Human nga natumba na sa dalan ang biktima midagan padulong sa eskina Doña Modesta Gaisano sa Sudlon ang tulo.
Gisulayan pa unta sila og gukod sa mga estambay apan dihang nisulod ni sa mga kabalayan wa na igkita pa ang tulo.
Narekober sa kapolisan ang usa ka kabhang sa bala sa kalibre .45 nga pistola sa crime scene.
Blangko pa karon ang Homicide Section sa motibo sa kamatayon sa biktima. (BANAT NEWS)
Linkback:
https://tubagbohol.mikeligalig.com/index.php?topic=79934.0
