Nasakiyo sa usa ka babayeng mangingilad og dul-an P100 mil nga kwarta gikan sa usa ka dakong bangko sa Sugbo human kini nagpaila nga anak sa mayor sa syudad sa Bogo pasado alas-3 sa miaging hapon sa barangay Lourdes syudad sa Bogo.
Ang Development Bank of the Philippines (DBP) Bogo branch manager nga si Juanita Mata, 58, sumala pa sa report sa kapolisan nailad sa nagpa-ilang Dr. Martinez nga anak kuno ni Bogo City Mayor Junie Martinez.
Sa pakighinabi sa Banat News ni PO3 Ramonito Canja sa Bogo City Police misaysay kini nga si Mata nakadawat og tawag gikan sa usa ka doktora ug nagpaila lang kini nga Dr. Martinez nga anak sa mayor.
Tunga-tunga sa ilang panag-estorya sa telepono mihangyo si “Dr. Martinez†nga aduna siyay P75 mil nga pulos tagsa ka libo ug gusto unta niini nga pailisan og tag P500.
Tungod sa pagsalig ni Mata mitugot kini nga pasensilyuhan ang maong kantidad ug giilisan og tag P500 ug mituman sa hangyo ni “Dr. Martinez†kang Mata nga dad-on ang maong kwarta sa iyang klinika.
Hinungdan nga gitawag ni Mata ang iyang teller nga nadestino sa New Account nga si Christopher Gutierrez ug gimandoan kini nga ipadala ang tag P500 moabot sa P75 mil sa klinika ni “Dr. Martinez.â€
Sumala pa sa kapolisan, diha palang sa gawas sa bangko adunay usa ka lalaking miduol kang Gutierrez nga nagpailang anak ni “Dr. Martinez†ug nangutana og “ikaw maoy Chris nga gisugo ni Nita?â€
Sa walay pagduha-duha mitubag si Gutierrez ug giingnan siya sa nagpaila nga anak ni Dr. Martinez nga adto nalang sila sa usa ka mall sa barangay Poblacion tungod kay si ‘Dr. Martinez’ atua didto nagpaabot.
Walay pagduha-duhang misakay si Gutierrez sa usa ka sakyanan ug mibiyahi sila ug di mominos usa ka kilometro padulong sa maong establisamento.
Pag-abot nila sa maong tindahan gidiskartihan sa nagpailang anak ni ‘Dr. Martinez’ nga ang iyang inahan atua sa sulod nagpaabot ug siya nalang ang modala sa maong kwarta ug gipapaabot si Gutierrez diha sa gawas.
Apan milabay nalang ang pila ka oras wala na mahibalik ang nagpailang anak ni Dr. Martinez ug tungod niini daling mi-report si Gutierrez sa iyang labaw kinsa mao na usab ang mipahibalo ngadto sa kapolisan.
Ang kapolisan padayon pang nagsusi sa maong grupo sa mangingilad samtang si Mayor Martinez miklaro sa kapolisan nga wala siyay anak nga doktora. - Nila ni Lesley Caminade, Darrel Carumba ug Romeo Limpangog
Linkback:
https://tubagbohol.mikeligalig.com/index.php?topic=34559.0
Topic: DBP Branch sa Cebu Nailad sa Nagpatuong Anak ug Mayor (Read 2116 times)