(Banat) | Updated February 7, 2015 - 12:00am
CEBU, Philippines - Usa ka 19 -anyos nga babaye uban sa iyang amahang tanod midangop ngadto sa kapolisan ug mipasangil sa amigong lalaki nga milugos kaniya samtang ang dalaga nahubog.
Ang pagpanglugos nahitabo diha mismo sa balay sa biktima sa usa sa mga barangay sa dakbayan sa Lapu-Lapu sa miaging Huwebes sa gabii. Usa ka 19-anyos usab nga lalaking tinun-an nga residente gihapon sa maong barangay ang gidakop sa amahan sa biktima.
Si Police Officer 2 Filipina Branzuela sa Women’s and Protection Desk Unit sa Gun-ob Police Station 3 mibutyag nga ang amahan sa biktima maoy nakadiskubre nga nagtupad og higda sa ilang sala ang duha nga pulos wa nay sapot.
Tungod sa kalagot sa amahan, gipalayas niini ang lalaki kinsa daling namunit sa iyang mga sapot ug mikaratel og dagan pauli sa ilaha.
Ang amahan midala sa anak ngadto sa kapolisan ug gilusad dayon ang hot pursuit operation nga miresulta sa pagkasikop sa suspek.
Nasuta sa imbestigasyon nga nakig-inom ang biktima sa suspek kauban ang ilang higalang babaye diha sa balay sa lalaki. Apan nahubog og maayo ang biktima ug gihatud sa duha sa ilang balay, tungod kay wa may tawo sa balay sa biktima, miboluntaryo ang lalaki nga kuyogan ang dalaga kay mopauli na ang ilang amigang babaye.
Apan sa pag-abot sa amahan sa babaye, iyang naabtan ang duha nga pulos wa nay sapot. Si Branzuela nagkanayon atol sa ilahang pagpangutana sa biktima kini mitug-an nga pwerte niyang huboga niadtong higayona ug nakabantay siya nga gihuboan siya sa suspek nga gilayon mipatong kaniya.
Si Branzuela nagkanayon nga kasong rape ang ipasaka batok sa suspetsado samtang ang biktima gipaubos sa eksaminasyon sa pink room sa Vicente Sotto Memorial Medical Center. (Christell Fatima Tudtud/EIM)(BANAT NEWS)
Linkback:
https://tubagbohol.mikeligalig.com/index.php?topic=79472.0