MikeLigalig.com

Ni Rowena Capistrano, EIM (Banat) | Updated July 26, 2015 - 12:00am


CEBU, Philippines - Blangko pa ang kapulisan sa lungsod sa Balamban bahin sa kamatayon sa usa ka 49-anyos nga dalagang nakit-ang wala nay kinabuhi ug hubo na ang lawas sa bukirang bahin sa Sitio Granada, Brgy. Biasong niadtong Biyernes.

Ang dalagang guwang naila nga si Rosabeth Napuli, taga Sitio Pulang Kimba sa mao gihapong barangay.

Matud pa ni Police Officer 1 Teofilo Verano Jr., sa Balamban Police Station, niadto pang Hulyo 21 sa hapon nilakaw si Napuli apan wa na kini mabalik sud sa pipila ka adlaw hangtod nga kini nakit-ang patay.

Gituohan nga gilugos ang biktima tungod kay wala na kini sapot ug adunay mga timailhang gidagmalan kini sa mga nipasipala kaniya.

Sumala pa ni Verano, adunay mga timailhan nga nanglimbasog si Napuli tungod sa mga samad nga naangkon niini sa iyang kalawasan ug ang samad sa liog.

Gihangyo sa kapolisan ang pamilya sa biktima nga ipaubos kini sa awtopsiya aron masayran nila kung unsay naingnan sa kamatayon niini.

Ang kapolisan padayon pang nag-imbestigar aron pag-ila kun kinsa ang mga kriminal nga nihimo sa maong krimen. (BANAT NEWS)