Ni Guam P. Logroño
Tuesday, November 13, 2012
BULSA sa shorts maoy nahurot og kaon sa usa ka mananagat aron siya mo-survive samtang naglutaw-lutaw sulod sa duha ka adlaw sa kadagatan sa wa pa na-rescue sa laing mananagat kagahapon sa alas 6:30 sa buntag sa Barangay Daanglungsud, Oslob, Sugbo.
Ang pumpboat sa mananagat nakulob samtang siya nanagat dihang gikuso-kuso sa dagkong bawod dala sa unos niadtong Dominggo sa kaadlawon.
Gihulagway ni Gomerciano Calma, 51, minyo, taga Barangay Talo-ot Argao, nga milagro sa Ginuo ang iyang pag-survive bisan sa kagutom, kauhaw ug katugnaw sa dagat samtang gikuso-kuso siya sa dagkong mga bawod.
Si Calma na-missing niadtong Dominggo sa alas 4;00 sa kadlawon samtang namasol sa kadagatan sa Barangay Taloot human gibanlas sa kusog nga bawod tungod sa low pressure area sa Mindanao.
Si PO2 Alexander Mendaros, sakop sa alert team sa Oslob Police nga nahinabi sa Sun.Star SuperbaÂlita, nagkanayon nga si Calma napalgan sa mananagat nga si Luciano Censoro, 62, taga Barangay Daanlungsud, Oslob.
Samtang didto sa lawod, gipakaon kini niya og linung-ag nga saging una pa gidala sa ilang balay ug gipapahulay dayon gipahibawo ang kapulisan sa Oslob, nga maoy ni-contact sa kapulisan sa Argao ug pamilya.
Si Luciano nibutyag nga iyang nakit-an si Calma nga pwerting luyaha nga nagkawaykaway nga nagpa-utaw-utaw sa dagat nga gihiktan ang lawas sa pisi ngadto sa pumpboat.
Si konsehal Danny Rodriquez, sa Barangay Talo-ot, kinsa suod nga higala ni Calma, uban sa pamilya ug mga higala maoy ning-adto sa Oslob.
Matod ni Rodriguez nga nahinabi sa Sun.Star Superbalita nga nagpasalamat sa Ginuo ang iyang higala sa ikaduhang kinabuhi niini.
Gibutyag niya nga si Calma nisulti kaniya nga 7-8 metros ang gidagkuon sa mga bawod nga mikuso-kuso kaniya niadtong Dominggo sa kadlawon.
Ang iyang mga kauban sa pagpanagat niawhag kaniyang mamauli na lang sila kay lain kaayo ang dagan sa panahon tungod sa kadagko sa mga bawod.
Wa siya mopatuo tungod sa kadaghan sa iyang mga kuha.
Wa magdugay gihapak sa dakong bawod ang iyang pumboat hinungdan nga nakulob.
Linkback:
https://tubagbohol.mikeligalig.com/index.php?topic=57705.0