Ang suspek mao si Daniel (bansagon gitago sanglit menor), 14, molupyo sa Barangay Buhangin, ning siyudad.
Si Daniel kasamtangang nagtungha sa maong eskwelahan, Grade VI section Universe.
Gibutyag sab sa adviser sa suspek nga si Almy Grace Velasquez nga wala siya nasayod nga dunay dalang kutsilyo ang iyang estudyante.
"Sa akong pagkasayod, buotan ug hilumon man na siya. Wala ko kabalo nga naa diay na siyay dala nga kutsilyo. Bisan sa pagkasayod nga naa siyay gang -- wala ko kabalo," pung sa adviser.
Dugang nasayran nga second year high school student ang biktima sa Davao City National High School (DCNHS), apan naundang na kini pagtungha gumikan milakaw ang iyang inahan sa Manila.
"Manghiram ra na siya og uniform aron makasulod sa City High ug sa Kapitan Tomas kay naa man na siyay kalagot sa akong barkada nga dunay gang. Uyab man to nila ilang gikasamukan," ni Jhacent Cotillar, higala sa suspek.
Gisugilon sab ni Merlinda Amistoso, principal sa Kapitan Tomas, nga kulang ang ilang guwardiya nga magbantay sa seguridad sa mga tawo nga mosulod-gawas sa maong tunghaan.
"Kulang gyod ang atong guwardiya. Usa ra god ni siya diha sa buntag ug usa sab sa gabii. Kuwang gyod mao na ang among problema karon," suma sa principal.
Ang biktima nakaangkon ug duha ka samad dinunggaban sa dughan nga maoy hinungdan sa hinanaling kamatayon niini.
Ang suspek anaa karon gikustodiya sa Women and Children's Protection Desk (WCPD) sa San Pedro Police Station.
Linkback:
https://tubagbohol.mikeligalig.com/index.php?topic=70834.0