Ni Stephanie Viovicente-Berganio
Wednesday, August 1, 2012
USA ka lalaki ang nag-amok og niihaw sa iyang kaugalingon nga asawa og parente mga alas 5:20 sa kadlawon sa Barangay Casinglot lungsod sa Tagoloan, Misamis Oriental.
Samtang patay usab ang suspetsado nga mao si Junie Macalaging, bana ni Crisanta human gipusil sa wala mailang suspetsado.
Gisaysay ni Senior Police Officer 2 Kenneth Achas sa Tagoloan Police Station nga nahinabi sa Sun.Star SuperBalita nga magtukar-tukar ang deperensya sa pangisip ni Junie og niadtong tungora kalit lang kining nagdala og sundang gikan sulod sa puloy-anan.
Samtang ang iyang asawa nga si Crisanta Macalaging nga nagtigway sa ilang binuhing baka iyahang giduol og giunay og tigbas. Gihiwa pa niini ang nawong og gi-ayo og tigbas ang ulo hinungdan nga nangawas ang sulod nga parte sa ulo niini, gihiwa pod niini ang lapa-lapa sa biktima hinungdan nga dead on the spot si Crisanta.
Human nahimo ang krimen nidagan ang suspetsado og mga usa ka kilometro ang kalay-on og dinhi nahinagbo niya ang iyang higala og parente nga si Rogelio Cublan, og sa dihang modagan unta si Cublan gideretso na siya og tigbas ni Junie susama sa gihimo niini sa iyang asawa.
Tungod kay nag-iyahay og pagpangtago ang mga silingan sa kahadlok, ang kagawad sa dapit nanawag sa kasikbit nga dapit nga magbantay kay unya makaabot kini sa unahan og mangbiktima pag-usab.
Apan dihang nahidangat na sa Purok 2A sa maong barangay si Junie aduna na osab kini natagbo nga usa ka wala mailang lalaki. Gitigbas dayon kini ni Junie apan aduna diay dala nga pistola ang maong lalaki og gipusil siya niini sa iyang pantog nga bahin hinungdan nga dead on the spot si Junie.
Ang kapolisan nangita pa og identipikasyon kung kinsa ang nakapatay ni Junie.
Nasayran nga si Junie giingo’ng mahilig mokaon og irong boang, ug paborito niini ang nilambunan nga utok sa iro.
Ang mga patay’ng lawas anaa karon sa Everlasting Funeral Homes giisa, samtang mihikay pa ang mga opisyal sa barangay aron mapahiluna ang mga biktima.
Gipatik sa mantalaang SuperBalita Cagayan de Oro Agosto 02, 2012.
Linkback:
https://tubagbohol.mikeligalig.com/index.php?topic=53226.0
