Ni Stephanie Viovicente-Berganio
Wednesday, August 1, 2012
DILI tiaw ang kamatayon sa usa ka babae nga naligo sa iyang kaugalingon nga dugo, nakaangkon og ubay-ubay ka mga samad dinunggaban sa lain-laing parte sa lawas niini nga nakaplagan kagahapon mga alas 7 sa buntag sa sitio Tugas Zone-8, Upper Bulua, ning siyudad sa Cagayan de Oro.
Ang Scene of Crimes Operatives (Soco) blanko pa sa identipikasyon sa biktima human walay nakita nga mga ID niini.
Si Police Senior Inspector Nelsedaca Villanueva maoy nangulo sa pagsusi sa patayng lawas niini nga nagkulob sa kasagbutan nga bahin.
Nasutang tulo ka samad dinunggaban sa dughan ang naangkon niini ug laing upat ka mga samad sa tiyan, liog ug laing parte sa lawas sa biktima.
Aduna usab kini samad sa iyang braso nga dayag nga gihiwa sa kutsilyo ug posibleng misuway pa sa pagsukol.
Nagsul-ob og puok nga short pants ang biktima, blouse nga stripe kombinasyon sa kolor violet ug puti nga nagisi na, natangtang na usab ang hook sa bra niini.
Anaa pa nasangit sa iyang abaga ang gamay nga sling bag niini nga adunay sulod lotion, cologne, kwarta nga P20, condom, ug cell phone nga samtang nagsusi ang sakop sa Soco kamulo usab kini sa pagsige og ring kay aduna pay mitawag niini.
Si Villanueva dili makasulti kung gilugos ba ang biktima labina wala man sab nakita nga hubo ang biktima. Kinahanglan gyod kining i-otopsiya aron masuta kung gawas sa pagpangluba, gilugos ba usab kini.
Ubay-ubay ang mga niusyuso sa pagkakita sa patayng lawas apan ni usa kanila walay nakaila niini. Nagtuo ang mga residente nga dili sa maong dapit nagpuyo ang biktima.
Dihang gidala na kini sa bollozos funeral parlor adunay nakasulti nga daw “Melody†ang pangalan niini, apan sa pakighinabi sa Sun.Star Superbalita sa nagdumala sa maong punerarya ilang giingon nga wala pa gihapon nagclaim sa patayng lawas.
Gipatik sa mantalaang SuperBalita Cagayan de Oro Agosto 01, 2012.
Linkback:
https://tubagbohol.mikeligalig.com/index.php?topic=53219.0
