by SunStar
OSPITAL ang gipadulngan sa usa ka lolo human gitigbas sa apo niini niadtong Lunes mga alas 5:00 sa hapon sa lungsod sa Baungon, Bukidnon.
Giila ang biktima nga mao si Leonilo Timuron, 67, balo, residente sa susamang dapit ug gitumbok nga suspek si Joenil, 18, apan giingong nagtungha pa sa high school.
Saysay sa anak sa biktima nga si Criselda nga buntag pa atol sa pagsugod sa klase nagkabikil ang iyang amahan ug apo niining si Joenil tungod kay daw gibinuangan sa apuhan nga dili nalang moeskwela kay walay nadato sa pag-eskwela.
Giingong nagsige na og undang undang sa pag-eskwela si Joenil sa sige og panglangyaw sa laing dapit.
Apan gibalewala sa apo tungod kay hilig man og pasiaw ang biktima, apan pagkahapon sa pag-uli niini aduna na sab gikabiklan ang apo apan dili na kalabot sa pag-eskwela tungod kay ngani magsige og handom si Leonilo nga sa dili pa siya mamatay makakita og proffessional nga apo.
Ang pagkabikil sa suspek miresulta sa pagkuha niini og sundang ug gitigbas ang bukton sa biktima.
Gidala sa Northern Mindanao Medical Center ang biktima kinsa anaa na sa luwas nga kahimtang ning panahona ug gikatakdang makagawas kagahapong adlawa.
Linkback:
https://tubagbohol.mikeligalig.com/index.php?topic=73329.0
